काठमाडौं । नयाँ आर्थिक वर्ष २०८०/८१ लाई सेयर बजारले स्वागत गरेको छ । यस वर्षको पहिलो कारोबार दिन नेप्से उच्च अंकले बढेको हो ।
अधिकांश वाणिज्य बैंक तथा वित्तीय संस्थाले साउनका लागि निक्षेपको ब्यादर घटाएका छन् । ऋणीले पनि असारसम्मको साँवाब्याज भुक्तानी गरिसकेका छन् । अब बैंक तथा वित्तीय संस्थाहरुले धमाधम वित्तीय विवरण र लाभांश घोषणा गर्ने सिजन सुरु हुन लागेको छ । यिनै कारण लगानीकर्ताको मनोबल बढाउँदा बजारले गति लिएको लगानीकर्ता बताउँछन् ।
सूचकसँगै कारोबार रकममा पनि सुधार आएको छ । अघिल्लो दिनको तुलनामा कारोबार रकम १९ करोडले बढेर २ अर्ब ५६ करोड रुपैयाँ पुगेको छ ।
सोमबार नेप्से परिसूचक ४७.०७ अंकले बढेर २१४४.१६ विन्दुमा पुगेको छ । यसदिन २५७ कम्पनीको ७६ लाख ३४ हजार १९० कित्ता सेयर किनबेच भएको छ ।
आज कारोबारमा आएका १३ वटा उपसमूह मध्ये म्युचुअल फण्ड बाहेक अरु सबै उपसमूहको परिसूचक बढेको छ । विकास बैंक समूहको परिसूचक सबैभन्दा धेरै ४.१४ प्रतिशतले बढेको छ ।
आज शिवम् सिमेन्टको सर्वाधिक कारोबार भएको छ । यसको पौने १५ करोड रुपैयाँ बढीको सेयर किनबेच भएको छ । त्यस्तै, हिमालयन लाइफको १० करोड र साइन रेसुंगा डेभलपमेन्ट बैंक पौने ८ करोडको कारोबार हुँदै शीर्ष तीनमा रहे ।
उच्च अंकले बढेको बजारमा आज ३ कम्पनीको सेयर मूल्यमा पोजेटिभ सर्किट लागेको छ । बीपीडब्ल्यू लघुवित्त, युनाइटेड अजोड इन्स्योरेन्स र अभियान लघुवित्तको सेयर मूल्य १० प्रतिशतले बढेको छ ।
