काठमाडौं । अमेरिकी डलर संचितिमा लगातार सुधार आएको छ । रेमिट्यान्स आप्रवाहमा वृद्धि, पर्यटकको आवगमन बढ्नु र विदेशी वस्तुको आयात घट्दा डलर संचितिमा सुधार आएको हो ।
दुई वर्ष यता लगातार ओरालो लागेको डलर संचिति चालु आवको असोजदेखि भने लगातार बढ्दो क्रममा रहेको हो । पछिल्लो एक महिनामा मात्रै राष्ट्रिय ढुकुटीबाट ९ करोड डलर थपिएको । नेपाल राष्ट्र बैंकले सोमबार सार्वजनिक गरेको चालु आर्थिक वर्षको ११ महिना (साउन-जेठ)को तथ्यांक अनुसार वैशाखको तुलनामा जेठमा डलर संचिति ९ करोडले बढेको हो ।
वैशाख मसान्तसम्म कुल डलर संचिति ११ अर्ब २१ करोड रहेकोमा जेठ मसान्त आइपुग्दा ९ करोडले बढेर ११ अर्ब ३० करोड पुगेको छ । यो पछिल्लो २१ महिना यताकै धेरै हो । यसअघि सन् २०२१ को अगस्ष्टमा ११ अर्ब ४२ करोड डलर संचिति थियो ।
गत असार मसान्तयता डलर संचिति १८.५ प्रतिशतले बढेको हो । २०७९ असार मसान्तसम्म राष्ट्रिय ढुकुटीमा ९ अर्ब ५४ करोड डलर संचिति थियो । डलर संचितिमा सुधार आएको यो लगातार आठौं महिना हो । राष्ट्रिय ढुकुटीमा असोजमा १३ करोड, कात्तिकमा १५ करोड, मंसिरमा १९ करोड, पुसमा ४८ करोड, माघमा २० करोड, फागुनमा १९ करोड, चैतमा २५ करोड र वैशाखमा २७ करोड डलर थपिएको थियो ।
सरकारले डलर संचिति घटेको भन्दै गत वर्षदेखि विभिन्न विलासी वस्तुको आयातमा प्रतिबन्ध लगाएको थियो । तर, चालु वर्षको पुसदेखि सरकारले आयात खुलाए पनि त्यसका बाबजूद डलर संचितिमा लगातार सुधार आएको हो ।
यस्तै, समग्र विदेशी मुद्रा संचितिमा पनि सुधार आएको छ । २०७९ असार मसान्तमा रु.१२१५ अर्ब ८० करोड बराबर रहेको कुल विदेशी विनिमय सञ्चिति २१.८ प्रतिशतले वृद्धि भई २०८० जेठ मसान्तमा रु.१४८० अर्ब ८७ करोड पुगेको छ ।
चालु आवको ११ महिनाको आयातलाई आधार मान्दा बैकिङ्ग क्षेत्रसँग रहेको विदेशी विनिमय सञ्चिति ११.२ महिनाको वस्तु आयात र ९.६ महिनाको वस्तु तथा सेवा आयात धान्न पर्याप्त रहने देखिन्छ ।
