काठमाडौं । वातावरणीय सामाजिक र सुशासन (ईएसजी)सँग सम्बन्धित गतिविधिहरुको संचालनका लागि संयुक्तरुपमा सहकार्य गर्ने गरी बैंक तथा वित्तीय संस्था परिसंघ नेपाल (सीबीफिन), डोल्मा कन्सल्टिङ र इन्भेष्ट फर इम्प्याक्ट नेपाल (आइआइएन) बीच सम्झौता भएको छ ।
बिहीबार सीबीफिनका अध्यक्ष पवनकुमार गोल्यान, डोल्मा कन्सल्टिङका प्रबन्ध निर्देशक जोसेफ सिल्भानस र आईआईएनका प्रमुख कार्यकारी अधिकृत विवेक श्रेष्ठले सम्झौता पत्रमा हस्ताक्षर गरेका हुन ।
लगानी गर्दा वातावरणीय, सामाजिक र सुशासनको क्षेत्रमा देखिने जोखिमहरुको अध्ययन, मूल्याङ्ककन, सुधार तथा व्यवस्थापन जस्ता साझा हितका कार्यहरुमा संयुक्तरुपमा सहकार्य गर्ने सम्झौताको मुख्य उद्देश्य रहेको छ ।
लगानी गर्दा प्राकृतिक स्रोत संरक्षण, हरितगृह ग्यास उत्सर्जन, विषाक्त फोहोरको व्यवस्थापन, जलवायु नीति एवं वातावरणीय नियमहरूको पालनाका विषयमा अन्तरक्रिया गरिने संघले जनाएको छ ।
सम्झौता अनुसार सिबिफिनले बैंक तथा वित्तीय क्षेत्रको सुधार एवं दिगो विकासका लागि सार्वजनिक–निजी संवाद, अध्ययन तथा अनुसन्धानका गतिविधिहरूको संचालन गर्नेछ । यस्ता गतिविधिहरुले बैंक तथा वित्तीय संस्थाहरुको व्यवस्थापन तथा संचालनमा महत्वपूर्ण सहयोग पुग्ने अपेक्षा गरिएको छ ।
डोल्मा कन्सल्टिङले स्रोत व्यवस्थापन इएसजी गतिविधिलाई दिगो बनाउनका लागि क्षमता विकासका गतिविधिहरूको तर्जुमा, सञ्चालन, व्यवस्थापन, अनुगमन तथा मूल्याङ्कनसहित जानकारीहरुको आदानप्रदान गर्ने कार्य गर्नेछ ।
आईआइएनले समग्र गतिविधिहरुको कार्यान्वयनको पर्यवेक्षण, स्रोत पहिचान तथा परिचालन, इएसजीको प्रवर्द्धन गर्न आवश्यक वकालत गर्नेछ । सम्झौताको पत्र प्रारम्भिक चरणमा १ वर्षको लागि कायम रहने र आवश्यकताका आधारमा थप अवधि गरिने संघले जनाएको छ ।
