काठमाडौं । नेपाल आयल निगमले हवाई इन्धनको मूल्य घटाएसँगै हवाई भाडा घटेको छ ।
निगमले सोमबार आन्तरिक हवाई इन्धनको मूल्य प्रतिलिटर १४ रुपैयाँ घटाएसँगै नागरिक उड्डयन प्राधिकरणले इन्धन शुल्क (फ्युल सरचार्ज) घटाइ हवाई भाडा समायोजन गरेको हो ।
प्रतिलिटर १५० रुपैयाँ रहेको हवाई इन्धनको भाउ ९.३ प्रतिशत घटाएर १३४ रुपैयाँमा झारेपछि प्राधिकरणले सोही आधारमा हवाई भाडादर समायोजन गरेको हो ।
प्राधिकरणका अनुसार मूल्य समायोजनपछि हवाई भाडा न्यूनतम १२५ रुपैयाँदेखि अधिकतम ७५० रुपैयाँसम्म घटेको छ । जसमा विराटनगर–नेपालगन्ज रुटमा सबैभन्दा धेरै ७५० रुपैयाँ घटेको छ ।
त्यस्तै, काठमाडौं–धनगढी ६१५, काठमाडौं–सुर्खेत ४८५, विराटनगर–नेपालगञ्ज ५५०, पोखरा–भद्रपुर ५७०रुपैयाँ घटेको छ ।
काठमाडौँबाट हुने पर्वतीय उडान (माउन्टेन फ्लाइट)को भाडा ४८५ रुपैयाँ घटेर भाडा ४हजार ६६५ रुपैयाँ कायम भएको छ ।
