काठमाडौं । एनआइएमबी एस क्यापिटल लिमिटेडको एकीकृत कारोबार सुरू भएको छ ।
साविकको एनआइबीएल एस क्यापिटलले मेगा क्यापिटल मार्केट्सलाई प्राप्ति गरी आजदेखि एनआइएमबी एस क्यापिटलको नामबाट एकीकृत कारोबार सुरु भएको हो ।
दुवै संस्थाहरुकोे गत जेठ २९ गतेको विशेष साधारण सभाले प्राप्ति सम्बनधी प्रस्ताव पारित गरेको थियो । दुवै क्यापिटल समान हैसियता अर्थात् १:१ सेयर अनुपातमा गाभिएका हुन् ।
एकीकृत कम्पनीको चुक्ता पूँजी ४७ करोड रुपैयाँ, ४ लाख ८५ हजार भन्दा बढी हितग्राही खाता, ७ वटा शाखा कार्यालयहरु र ५५ वटाभन्दा बढी कम्पनीको सेयर रजिष्ट्रार कार्यमार्फत करिब २५ लाखभन्दा बढी सेयरधनीहरुलाई सेवा प्रदान हुने कम्पनीले जानकारी दिएको छ ।
मर्जरपछि हाल गर्दै आएको मर्चेन्ट बैंकिङ तथा इन्भेष्टमेण्ट बैंकिङ व्यवसायमा गुणात्मक असर पर्नुको साथै प्रदान भइरहेका सेवाहरु अझ सुदृढ र सशक्त रूपमा विस्तार हँुदै धितोपत्र बजारमा आफ्नो विशिष्ट पहिचान बनाउन सकिने विश्वास क्यापिटलले लिएको छ ।
