काठमाडौं । त्रिभुवन अन्तर्राष्ट्रिय विमानस्थलमा यात्रुको बिदाइ र स्वागतमा कडाइ गरिएको छ ।
विमानस्थलको ट्रमिनल भवन बाहिर आफन्त बिदाइ र स्वागतका लागि जानेहरुको भीड बढेपछि विमानस्थल कार्यालयले अब एक जना यात्रुको बिदाइ तथा स्वागतका लागि ३ जना मात्रै जान पाउने व्यवस्था गरेको हो ।
यात्रुको बिदाइ तथा स्वागतका लागि आवश्यकता भन्दा बढी मानिसहरु जाँदा आन्तरिक र अन्तर्राष्ट्रिय टर्मिनल बाहिर अत्यधिक भीड हुने गरेको छ । त्यसले ट्राफिक व्यवस्थापनमा समस्या हुनुका साथै दुर्घटनाको जोखिम समेत बढेकाले भीड नियन्त्रणका लागि कडाइ गरिएको विमानस्थल कार्यालयले जनाएको छ ।
टर्मिनल भवन अगाडि भीड बढ्दा यात्रुको सेवामा असर परेको र प्यासेन्जर ड्रप एरियामा दुर्घटनाको जोखिम बढेको विमानस्थल सुरक्षा समितिकाे भनाइ छ ।
अन्तर्राष्ट्रिय टर्मिनलमा साँझदेखि राति १० बजेसम्म अत्यधिक भीड हुने गरेको छ ।पछिल्लो समय दैनिक २५०० बढी नेपाली वैदेशिक रोजगारीमा गइरहेका छन् । उनीहरूलाई बिदाइ गर्न ठूलो संख्यामा आफन्तहरु विमानस्थलसम्म जाने गरेका छन् ।
अन्तर्राष्ट्रिय विमानस्थलमा तीन नेपालीसहित ३० वायुसेवा प्रदायकले अन्तर्राष्ट्रिय उडान भर्दै आएका छन् । आन्तरिकतर्फ ११ हेलिकप्टर कम्पनीसहित २० वायुसेवा प्रदायकले उडान भरिरहेका छन् ।
