काडमाडौं । विशेष अदालतले कर फछ्र्यौट आयोगका पूर्वअध्यक्ष लुम्बध्वज महतसहित ३ जनालाई ९ वर्ष कैद सजाय सुनाएको छ ।
मंगलबार विशेष अदालतका अध्यक्ष न्यायाधीश श्रीकान्त पौडेल, सदस्य न्यायाधीशहरू यमुना भट्टराई र शालिग्राम कोइरालाको इजलासले अध्यक्ष महतसहित सदस्य उमेश ढकाल र आन्तरिक राजश्व विभागका महानिर्देशक चुडामणि शर्मालाई भ्रष्टाचार मुद्दामा ९ वर्ष कैद सजाय सुनाएको हो ।
अदालतले लुम्बध्वज महतलाई ९ वर्ष १ महिना कैद सुनाएको छ भने ढकाल र शर्मालाई ९/९ वर्ष कैद तोकेको छ । यस्तै, इजलासले उनीहरूलाई ४ अर्ब १० करोड ४६ लाख ९७ हजार ८९८ रुपैयाँको जरिवाना सुनाएको छ ।
अदालतले यसअघि जेठ १८ गते तीनै जनालाई भ्रष्टाचार मुद्दामा दोषी ठहर गरेको थियो । राजस्व चुहावट गरी १० अर्ब ९६ करोड बढी भ्रष्टाचार गरेको भन्दै अख्तियारले अख्तियारले २०७४ असारमा उनीहरु विरुघ मुद्दा दायर गरेको थियो ।
