काठमाडौं । नेपालबाट भारत बिजुली निर्यात फेरि सुरू भएको छ । नेपाल विद्युत् प्राधिकरणले यस वर्ष शनिबारदेखि इण्डियन इनर्जी एक्सचेन्ज मार्केटमा बिजुली बेच्न थालेको हो ।
हिउँद लागेसँगै प्राधिकरणले गत पुस ३ गतेदेखि भारत विद्युत् निर्यात बन्द गरेको थियो । अहिले मनसुन सुरू भएसँगै नदीमा पानीको बहाव बढ्दा विद्युत् उत्पादन बढ्न थालेपछि प्राधिकरणले निर्यात सुरू गरेको हो ।
प्राधिकरणका अनुसार शनिबार १०० मेगावाट विद्युत् भारत निर्यात भएको छ । सो बिजुली प्रतियुनिट ७ रुपैयाँ हाराहारी दरले निर्यात भएको प्राधिकरले जनाएको छ ।
हाल नेपालको कुल विद्युत् जडित क्षमता २ हजार ७०० मेगावाट पुगेको छ भने चालु वर्षभित्रै थप ३०० मेगावाट थपिने छ । अहिले कुल पिकअप डिमान्ड १८०० मेगावट रहेको छ ।
हाल नेपालले कुल ४५२ मेगावाट भारत निर्यातका लागि अनुमति पाएको छ । भारतले थप बिजुली निर्यातको अनुमति नदिए वर्षायाममा करिब ८०० मेगावाट बिजुली खेर जाने देखिन्छ ।
गत वर्ष १० अर्ब बढीको बिजुली बेचेको प्राधिकरणले चालु आवमा २० अर्ब बढीको बिजुली बेच्ने लक्ष्य राखेको छ । यही जेठ १७ गते प्रधानमन्त्री पुष्पकमल दाहाल भारत भ्रमण जाँदा थप बिजुली निर्यातको सम्झौता हुने प्राधिकरणको अपेक्षा छ ।
