काठमाडौं । कृषि तथा पशुपंक्षी विकास मन्त्रालयले आगामी आर्थिक वर्ष २०८०/८१ मा रासायिनक मल खरिद गर्न बजेट दोब्बरले बढाउन प्रस्ताव गरेको छ ।
मन्त्रालयले आगामी वर्ष मल खरिदका लागि ३० अर्ब रुपैयाँको बजेट सिलिङ तोकिएको छ । यो चालु आवकोभन्दा दोब्बर बढी हो । चालु आर्थिक वर्षमा मल खरिदका लागि १५ अर्ब रुपैयाँ विनियोजन गरिएको थियो ।
बजेट अभावका कारण समयमै मल ल्याउन नसक्दा वर्षेनी खेती गर्ने समयमा अभाव हुने गरेको छ । त्यसैलाई मध्येनजर गर्दै मन्त्रालयले बजेट बढाएको हो ।
देशभर कुल ५ लाख २० हजार मेट्रिकटन रासायनिक मल आवश्यक पर्छ । चालु आर्थिक वर्ष २०७९/८० मा मल आयातका क्रममा १२ अर्ब ७५ करोड रुपैयाँ खर्च भइसकेको मन्त्रालयका प्रवक्ता प्रकाशकुमार संजेलले बताए ।
उनका अनुसार उक्त रकममा १ लाख २५ हजार टन मल आयात भइसकेको छ भने २ लाख ६ हजार मेट्रिकटन मल आयातको क्रममा रहेको छ । सरकारले चालु आवमा जीटुजी सहित ३ लाख ३१ हजार मेट्रिकटन मल आयात गर्ने लक्ष्य राखेको छ ।
आयात भएको १ लाख २५ हजार मेट्रिकटन मलमध्ये हालसम्म ९० हजार मेट्रिकटन मल विक्री वितरण भइसकेको प्रवक्ता संजेलले बताए । उनले नेपालको माग अनुसार मल ल्याउन ४४ अर्ब हाराहारी बजेट आवश्यक पर्ने बताए ।
आगामी आर्थिक वर्ष २०८०/८१ का लागि कृषि तथा पशुपंक्षी विकास मन्त्रालयले ५२ अर्ब ६५ करोड रूपैयाँको बजेट सिलिङ पाएको मन्त्रालयले जनाएको छ । मन्त्रालयका बजेट शाखाका प्रमुख शिशिर पोलका अनुसार सिलिङका क्रममा रसायनिक मल खरिदलाई बढी प्राथमिकता दिइएको छ ।
रसायनिक मल खरिदका लागि बजेट सिलिङको ५९ प्रतिशत रकम छुट्याइएको उनले बताए । मल अभाव हुन नदिनलाई बजेट सुनिश्चित गरिएको उनले बताए । चालु आर्थिक वर्षमा ५५ अर्ब ९७ करोड रुपैयाँ बजेट विनियोजन गरिएको थियो ।
