काठमाडौं । नारायणघाट–बुटवल सडक विस्तारको ठेक्का सम्झौता सकिन तीन महिना मात्र बाँकी हुँदा भौतिक प्रगति भने ३० प्रतिशत मात्र भएको छ ।
निर्माणमा गरिएको ढिलाइ र सुस्तताले म्याद सकिने अवधिसम्म आधा पनि भौतिक प्रगति भएको छैन । ठेक्का सम्झौता अवधिमा सडक विस्तार आयोजना निर्माण हुन नसकेपछि सरकारले म्याद थप्ने तयारी गरेको छ ।
आयोजनाका सूचना अधिकारी तथा इन्जिनियर शिव खत्रीका अनुसार चालु आर्थिक वर्षमा आयोजना अन्तर्गत ६ प्रतिशत मात्र काम भएको छ । २०७५ चैत्रमा चाइना स्टेट कन्स्ट्रक्सनलाई ठेक्का दिइएको यो आयोजनाको अन्तिम म्याद २०८० साउन २२ गतेसम्म छ ।
ठेक्का सम्झौता अनुसार २ लेयरको कालापत्रे गर्नुपर्छ । तर, हालसम्म ५.६ किलोमिटर सडकमा पहिलो लेयरको कालोपत्रे सम्पन्न भएको उनले बताए । ४९ किलोमिटर मध्ये जम्मा ५.६ किलोमिटर सडक कालोपत्रे भएको हो ।
२५३ मध्ये १३२ वटा कल्भ निर्माण भएको उनले जानकारी दिए । साना पुलहरु २१ वटा रहेकोमा १३ वटा पुरा भइसकेका छन् । उनले मुख्य ठूला पुलहरु ९ वटा रहेकामा ३ वटाको निर्माण सम्पन्न भएको बताए ।
४०.८ किलोमिटरमा नाली निर्माणको काम गर्नुपर्नेमा २०.२ किलोमिटर नालीको काम सम्पन्न भएको छ । ‘५.६ किलोमिटर सडक कालोपत्रे भइसकेको छ, म्याद सकिन ३ महिना बाँकी छ, म्याद थपको प्रक्रिया भइरहेको छ,’ इन्जिनियर खत्रीले भने । उनका अनुसार हाल बदरा खण्डमा कालोपत्रेको काम भइरहेको छ ।
म्याद थप गर्ने तयारी
चिनीयाँ कम्पनीले निर्माण पुरा गर्न म्याद थपका लागि माग गरेको उनले बताए । विगतमा कोभिड–१९ का कारण प्रगति देखाउन नसकेको नारायाणघाट– बुटवल सडक विस्तार आयोजनाले १ वर्षका लागि म्याद थपको माग गरेको छ ।
उनले आयोजनामा चिनीयाँँ कम्पनीले कामको गति बढाएका कारण म्याद थप गरेर निर्माण अघि बढाइने बताए ।
निर्माणमा लाप्रबाही
विस्तारको क्रममा रहेको पूर्व–पश्चिम राजमार्ग अन्तर्गत नारायणघाट–बुटवल खण्डको काम सुरु भएको ४८ महिना अर्थात ५ वर्ष पुरा हुनै लाग्दा समेत न्यून प्रगति देखिएको छ ।
विगतमा कोभिड–१९ का कारण प्रगति देखाउन नसकेको यस सडक विस्तार आयोजनाको रुख कटान, बिजुलीका पोल, उपकरण परिचालन लगायतका कारण ढिलाइ भएको ठेकेदार कम्पनीले बताउदै आएको छ ।
कोभिडमा रोकिएको आयोजना त्यसपछि क्रसर उद्योग बन्द भएका कारण गति लिन नसकेको उसको दाबी छ । तर, निर्माणमा लाप्रबाही र विभिन्न बाहना गर्दा समयमै बन्नुपर्ने आयोजना अलपत्र जस्तै छ ।
आयोजना सुरुभएदेखि हालसम्म १७ प्रतिशत रकम भुक्तानी भइसकेको छ । एसियाली विकास बैंक (एडीबी) को ८५ प्रतिशत ऋण सहयोगमा यो सडक विस्तार भइरहेको आयोजनाको प्याकेज–१ को लागत ९ अर्ब १५ करोड ७२ र प्याकेज–२ को लागत ७ अर्ब ८६ करोड ३२ लाख रुपैयाँ लाग्ने अनुमान गरिएको छ ।
