काठमाडौं । लक्ष्मी बैंकले नेपाल प्रहरीका छोराछोरीलाई छात्रवृत्ति दिन २५ लाख रुपैयाँको अक्षय कोष स्थापना गरेको छ ।
बैंकले नेपाल प्रहरी कल्याण कोषसँग २५ लाखको छात्रवृत्ति अक्षय कोष स्थापना गर्ने सम्झौता गरेको हो। सम्झौतामा बैंकका रिटेल फाइनान्स सर्भिसेसका प्रमुख दिपेश अमात्य र नेपाल प्रहरी नायब महानिरीक्षक केदार ढकालले हस्ताक्षर गरेका हुन्।
सम्झौता अनुसार बैंकले वार्षिक ७ लाख ५० हजार रुपैयाँ दरले आगामी ५ वर्षसम्म आर्थिक सहयोग गर्ने प्रतिबद्वता जनाएको छ।
छात्रवृत्ति कोषबाट प्रहरी विद्यालयहरुमा अध्ययनरत जेहेन्दार छात्राहरुलाई छात्रवृत्ति प्रदान गरिने जनाएको छ । बैंकका अनुसार सहिद, अवकाश प्राप्त,अशक्त जुनियर प्रहरी अधिकृत दर्जाका परिवारलाई छात्रवृत्ति दिइनेछ।
छात्रवृत्तिको छनोट प्रक्रिया नेपाल प्रहरीले व्यवस्थापन गर्ने छ। बैंकले आर्थिक सहयोग गर्नेछ।
