काठमाडौं । नयाँ स्टक एक्स्चेन्जको लागि तीन कम्पनीले आवेदन दिएको छ । नयाँ स्टकका लागि आवेदन दिने अन्तिम दिन आइतबारसम्म तीन कम्पनीले आवेदन दिएका हुन् ।
नेपाल धितोपत्र बोर्डका अनुसार हिमालयन स्टक एक्स्चेन्ज, नेशनल स्टक एक्स्चेन्ज र अन्नपूर्ण स्टक एक्स्चेन्जले आवेदन दिएका हुन् ।
बोर्डले गत चैत ३० गते १० दिनको म्याद राखेर एउटा नयाँ स्कट एक्स्चेन्जका लागि आवेदन आह्वान गरेको थियो । अब आवेदन दिएका ३ मध्ये एउटा कम्पनीले लाइसेन्स पाउने छन् ।
लाइसेन्स हात पार्न नेपालका ठूला व्यवसायिक घरानाबीच प्रतिस्पर्धा हुने भएको छ । यसमा आर्थिक चलखेल र राजनीतिक दाउपेच समेत जोडिने भएकाले कसले लाइसेन्स हात पार्छ भन्ने टुंगो छैन ।
हिमालयन स्टकमा हिमालयन रि इन्स्योरेन्सका संचालकहरू नै मुख्य लगानीकर्ता रहेका छन् ।जसमा दीपक भट्ट, शेखर गोल्छा, पशुपति मुरारका, भवानी राणा लगायतको लगानी छ ।
यस्तै, नेशनलमा सिदार्थ ग्रुप, अग्नी ग्रुप, दीपम तिमलसिना, एनआरएनको पूर्व अध्यक्ष जीवा लामिछाने लगायतको लगानी रहेको छ । बोर्डका अनुसार नयाँ स्टकको चुक्ता पूँजी ३ अर्ब हुनुपर्नेछ । जसमा संस्थापकको ७० प्रतिशत र सर्वसाधरणको ३० प्रतिशत लगानी रहने छ ।
यस्तै, कमोडिटी एक्स्चेन्जका लागि पनि चार कम्पनीले आवेदन दिएका छन् । बोर्डका अनुसार हिमालयन कमोडिटिज एण्ड डेरिभेटिभ एक्सचेन्ज, मल्टी डेरिभेटिभ एक्सचेन्ज, नेपाल मल्टी कमोडीटी एक्सचेन्ज र मल्टी एसेट्स एण्ड डेरिभेटिभ एक्सचेन्जले आवेदन दिएका छन् ।
बोर्डले दुई वटा कमोडिटी एक्स्चेन्जका लागि आवेदन आह्वान गरेकामा चार कम्पनीले आवेदन दिएका हुन् । तीमध्ये अब दुईले लाइसेन्स पाउने छन् ।
सर्वोच्च अदालतको गत चैत २६ गतेको फैसलाले नयाँ स्टक कम्पनी, कमोडिटी मार्केट र धितोपत्र कारोबारका लागि नयाँ दलाल व्यवसायी (ब्रोकर) लाइसेन्स जारी गर्न बोर्डलाई बाटो खुलेको थियो ।
धितोपत्र बोर्डले गत असोज २ गते नयाँ स्टक र धितोपत्र दलाल व्यापारीको अनुमतिपत्रका लागि निवदेन मागेको थियो । बोर्डको उक्त निर्णयविरुद्ध प्रधानमन्त्री तथा मन्त्रिपरिषद्को कार्यालय, अर्थ मन्त्रालय, नेपाल धितोपत्र बोर्ड र नेपाल स्टक एक्सचेन्जसमेतलाई विपक्षी बनाई अधिवक्ता दीपक विक्रम मिश्रले गत असोज ३१ गते सर्वोच्च अदालतमा मुद्दा दायर गरेका थिए । तर उक्त मुद्दा सर्वोच्चको चैत २६ गतेको फैसलाले खारेज गरेपछि धितोपत्र बोर्डले चैत ३० गते सूचना जारी गर्दै वैशाख १० गतेसम्म आवेदन दिइसक्न भनेको थियो ।
धितोपत्र बजारको विकास तथा विस्तारका लागि नयाँ स्टक एक्सचेन्ज तथा कमोडिटी मार्केट खोल्न र थप ब्रोकर लाइसेन्स खुलाउन आवश्यक रहेको बोर्डले बताउँदै आएको छ । धितोपत्र बजारलाई थप प्रतिस्पर्धी, प्रभावकारी, लगानीकर्तामैत्री एवम् अन्तर्राष्ट्रियस्तरको प्रविधि सहितको बनाउन पनि बजारमा नयाँ स्टक चाहिने बोर्डको भनाइ छ ।
