काठमाडौं । नेपाल राष्ट्र बैंकले डेपुटी गर्भनर शिवराज श्रेष्ठ निलम्बनमा परेका छन् । राष्ट्र बैंक ऐन अनुसार श्रेष्ठमाथि परेको उजुरीको विषयमा छानबिन समिति गठन भएसँगै डेपुटी गभर्नर श्रेष्ठ निलम्बनमा परेका हुन् ।
राष्ट्र बैंकले श्रेष्ठमाथि छानबिन गर्न सोमबार ३ सदस्यीय समिति गठन गरेको छ । सरकारले श्रेष्ठको विषयमा छानविन गर्न निर्देशन दिएपछि श्रीराम पौडेलको संयोजकत्वमा डा. सुबोधकुमार कर्ण र रामजी रेग्मी सदस्य रहेको ३ सदस्यीय समिति गठन गरेको हो ।
श्रेष्ठमाथि लागेका आरोपहरुको छानबिन गर्न एक महिनाको समय दिइएको छ । छानबिन समितिले श्रेष्ठलाई दोषी फेला गरेमा एकपटक स्पष्टीकरणको मौका दिइने राष्ट्र बैंकले बताएको छ । स्पष्टीकरण चुत्तबुझ्दो नभए श्रेष्ठलाई बर्खास्त गरिनेछ ।
श्रेष्ठमाथि वित्तीय स्थायित्वमा खलल पर्ने काम गरेको, सम्पत्ति शुद्धिकरण अनुसन्धान विभागमा विभिन्न उजुरी परेको र विभिन्न बैंकको खराब कर्जा लुकाउन भूमिका खेलेको लगायतका आरोप लागेका छन् ।
