काठमाडौं । नेपाल धितोपत्र बोर्डले नेपाल हाइड्रो डेभलपर कम्पनीका तत्कालीन अध्यक्ष ज्ञानेन्द्रलाल प्रधानलाई कारबाही गरेको छ ।
आइतबार बसेको बोर्ड संचालक समितिको बैठकले उनलाई कारबाही गर्ने निर्णय गरेको हो । प्रधानले धितोपत्र दर्ता तथा निष्कासन नियमावली विपरीत कारोबार गरेको ठहर गर्दै बोर्डले कारबाही गरेको हो ।
धितोपत्र नियमावली अनुसार कुनै पनि पब्लिक कम्पनीको संचालक हुँदा सेयर कारोबार गर्न नपाइने भए पनि प्रधानले आफू पदमा हुँदै आफ्नो नामको सेयर परिवारको नाममा हस्तान्तरण गरेको पाइएको छ ।
बोर्डले धितोपत्र ऐन २०६३ को दफा १०१ (७) अनुसार कारबाही गर्दै ७५ हजार जरीवाना गरेको छ। साथै, बोर्डले उनलाई १० वर्ष कुनै पनि पब्लिक कम्पनीमा संचालक हुन नपाउने जनाएको छ ।
