काठमाडौं । सेयर बजारमा दोहोरो अंकको गिरावट आएको छ । अघिल्ला ३ दिनमा लगातार ३० अंकले बढेको नेप्से आज दोहोरो अंकले घटेको हो ।
सूचकमा गिरावट आए पनि आज कारोबार रकममा भने झिनो बढोत्तरी आएको छ । अघिल्लो दिनको तुलनामा कारोबार रकम ८ करोडले बढेर ८९ करोडमा पुगेको छ ।
बिहीबार सेयर बजार मापक सूचक नेप्से १०.८७ अंकले घटेर १९०८.५५ बिन्दुमा आइपुगेको छ । यसदिन २५४ कम्पनीको २७ लाख ५० हजार ६५५ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये होटल र म्युचुअल फण्डबाहेक अरु सबै समूहको परिसूचक राताम्मे भएको छ । अन्य समूह सबैभन्दा धेरै १.११ प्रतिशतले घटेको छ ।
आज शिवम सिमेन्टकोे सर्वाधिक कारोबार भएको छ । यसको ५ करोड रुपैयाँ बढीको सेयर किनबेच भएको छ । त्यस्तै, हिमालयन डिस्ट्रीलरी ३ करोड र जीवन विकास लघुवित्त २ करोड बढीको कारोबार हुँदै शीर्ष तीनमा रहे ।
दोहोरो अंकले घटेको बजारमा आज आदर्श लघुवित्तका सेयरधनीले सबैभन्दा धेरै ६.०७ प्रतिशतले घटेको छ । त्यस्तै, जाल्पा लघुवित्त, सपोर्ट माइक्रोफाइनान्स, विशाल बजार, मनकामना स्मार्ट र वीन नेपाल लघुवित्तको सेयर मूल्य साढे ३ प्रतिशतले घटेको छ ।
