काठमाडौं । सेयर बजारमा लगातार दोहोरो अंककाे गिरावट आएको छ । बुधबार १५ अंकले घटेको नेप्से आज सोभन्दा धेरै अंकले घटेको हो ।
सूचकमा गिरावट आए पनि कारोबार रकममा भने झिनो बढोत्तरी आएको छ । अघिल्लो दिनको तुलनामा कारोबार रकम ८ करोडले बढेर १ अर्ब ४१ करोड नाघेको छ ।
बिहीबार सेयर बजार मापक सूचक नेप्से १८.१५ अंकले घटेर १९१५.१४ बिन्दुमा आइपुगेको छ । यसदिन २५९ कम्पनीको १ अर्ब ४१ करोड रुपैयाँ बढीको ४३ लाख ४० हजार २७० कित्ता सेयर किनबेच भएको छ ।
आज कारोबारमा आएका १३ वटै उपसमूहको परिसूचक राताम्मे भएको छ । व्यापार समूहको परिसूचक सबैभन्दा धेरै ३.०५ प्रतिशतले घटेकोे छ ।
आज एनआइसी एशिया बैंकको सर्वाधिक कारोबार भएको छ । यसको झन्डै पौने २२ करोड रुपैयाँ बढीको सेयर किनबेच भएको छ । त्यस्तै, सिद्धार्थ बैंकको ८ करोड र हिमालयन डिस्ट्रीलरी साढे ४ करोड बढीको कारोबार हुँदै शीर्ष तीनमा रहे ।
दोहोरो अंकले घटेको बजारमा पनि आज दुई कम्पनीको सेयर मूल्यमा पोजेटिभ सर्किट लागेको छ । मायाखोला हाइड्रोपावरको सेयर मूल्य ठ्याक्कै १० प्रतिशतले बढेको छ भने एशियन हाइड्रोपावरका सेयरधनीले पनि करिब १० प्रतिशत कमाएका छन् ।
