काठमाडौं । चालु आर्थिक वर्षको आठ महिना (साउन-फागुन)मसान्तसम्म नेपालको व्यापार घाटा साढे ९ खर्ब पुगेको छ । भन्सार विभागको तथ्यांक अनुसार फागुन मसान्तसम्म नेपालको व्यापार घाटा ९ खर्ब ५३ अर्ब ७३ करोड रुपैयाँ रहेको छ ।
यो गत वर्षको सो अवधिको तुलनामा १७.८६ प्रतिशत कम हो । गत वर्षको फागुन मसान्तसम्म ११ खर्ब ६० अर्ब ९ करोड रुपैयाँ बराबरको व्यापार घाटा भएको थियो ।
यस आवमा वैदेशिक व्यापारको हिस्सा पनि घटेको विभागले जनाएको छ । गत वर्षको ८ महिनामा १४ खर्ब ५६ अर्ब ४८ करोड रुपैयाँ बराबरको कुल वैदेशिक व्यापार रहेकोमा यस वर्ष २०.१४ प्रतिशतले घटेर ११ खर्ब ६३ अर्ब १८ करोड रुपैयाँमा सीमित भएको छ ।
समीक्षा अवधिमा आयात निर्यात दुवै घटेको छ । चालु आवमा आयात १९.१३ प्रतिशतले घटेर १० खर्ब ५८ अर्ब रुपैयाँमा सीमित भएको छ । गत वर्षको सोही अवधिमा १३ खर्ब ८ अर्ब रुपैयाँ बराबरको सामान आयात गरिएको थियो ।
यस्तै, चालु वर्षमा नेपालबाट हुने निर्यात पनि २९.०७ प्रतिशतले घटेको छ । विभागका अनुसार फागुन मसान्तसम्ममा नेपालबाट १ खर्ब ४ अर्ब रुपैयाँ बढीको वस्तु निर्यात भएको छ । गत वर्ष सोही अवधिमा १ खर्ब ४७ अर्ब रुपैयाँ बराबरको वस्तु निर्यात भएको थियो ।
