काठमाडौं । नेपाल स्टक एक्सचेञ्ज (नेप्से)ले दुई लघुवित्तको सेयर कारोबार रोक्का गरेको छ । नेप्सेले आज लाभांश घोषणा गरेका महिला लघुवित्त वित्तीय संस्था र महुली लघुवित्तको सेयर कारोबार रोक्का गरेको हो ।
दुवै लघुवित्तले गत आर्थिक वर्ष २०७८/७९ को नाफाबाट लाभांश घोषणा गरेको पत्र कारोबार भइरहेको समयमा पठाएकाले धितोपत्र सूचीकरण विनियमावली अनुसार सेयर कारोबार रोक्का गरिएको नेप्सेले जनाएको छ ।
साथै, नेप्सेले दुवै लघुवित्तलाई के कति कारणले कारोबार भइरहेको समयमा पत्र पठाएको भन्दै ३ दिन भित्र स्पष्टीकरण पेश गर्न भनेको छ ।
महिला लघुवित्तले गत आवको मुनाफाबाट ४७.५ प्रतिशत बोनश सेयर र कर प्रयोजनका लागि २.५ प्रतिशत नगद गरी कुल ५० प्रतिशत लाभांश घोषणा गरेको छ ।
त्यस्तै, महुली लघुवित्तले गत वर्षको मुनाफाबाट २० प्रतिशत बोनश सेयर र ५ प्रतिशत नगद गरी कुल २५ प्रतिशत लाभांश घोषणा गरेको छ ।
