काठमाडौं । सेयर बजारमा दोहोरो अंकको वृद्धि भएको छ । गतसाता १६१ अंकले बढेको नेप्सेले यस साता पनि आफ्नो उकालो यात्रा जारी राखेको हो ।
सूचकसँगै आज कारोबार रकममा उच्च वृद्धि आएको छ । गत साता औसतमा अढाई अर्ब कारोबार हुँदै आएकोमा आज ४ अर्ब नाघेको छ ।
आइतबार नेप्से १७.२४ अंकले बढेर २०४६.२६ विन्दुमा पुगेको छ । यसदिन २६१ कम्पनीको ४ अर्ब ४ करोड रुपैयाँ बढीको १ करोड ८ लाख ८० हजार ९०४ कित्ता सेयर किनबेच भएको छ ।
आज कारोबारमा आएका १३ वटा उपसमूह मध्ये फाइनान्स र विकास बैंक बाहेक अरु सबै उपसमूहको परिसूचकमा हरियाली छाएको छ । जीवन बीमा उपसमूह सबैभन्दा धेरै २.९९ प्रतिशतले बढेको छ ।
आज नबिल बैंकको सर्वाधिक कारोबार भएको छ । यसको साढे २२ करोड रुपैयाँ बढीको सेयर किनबेच भएको छ । त्यस्तै, नेपाल टेलिकम झन्डै २० करोड र हिमालयन डिस्ट्रीलरी १८ करोड बढीको कारोबार हुँदै शीर्ष तीनमा रहे ।
दोहोरो अंकले बढेको बजारमा ५ कम्पनीको सेयर मूल्यमा पोजेटिभ सर्किट लागेको छ । श्रृजनशील लघुवित्तको सेयर मूल्य ठ्याक्कै १० प्रतिशतले बढेको छ भने खप्तड लघुवित्त, धौलागिरी लघुवित्त, अजोड इन्स्योरेन्स र प्रभु लाइफका सेयरधनीले पनि करिब १० प्रतिशत कमाएका छन् ।
