काठमाडौं । नेपाल स्टक एक्स्चेन्ज (नेप्से)मा सूचीकृत ६ कम्पनीको लाभांश सुरक्षित गर्ने आज अन्तिम दिन रहेको छ । नबिल बैंक, हिमालयन बैंक, नेपाल टेलिकम, सिद्धार्थ इन्स्योरेन्स, महालक्ष्मी विकास बैंक र बुटबल पावर कम्पनीको लाभांश पाउन सेयर किन्ने आज अन्तिम दिन हो ।
६ वटै कम्पनीले साधरण सभा प्रयोजनका लागि पुस १८ गते बुकक्लोज तोकेको छन् । सो अनुसार आजसम्म कायम रहने सेयरधनी मात्र कम्पनीको लाभांश पाउने छन् ।
नबिल बैंकले गत आर्थिक वर्ष २०७८/७९ को मुनाफाबाट ११.५ प्रतिशत बोनस सेयर र कर प्रयोजनका लागि ११.५ प्रतिशत नगद गरी कुल ३० प्रतिशत लाभांश प्रस्ताव गरेको छ । उक्त लाभांश पारित गर्न बैंकले पुस २९ वार्षिक साधारण सभा बोलाएको छ ।
त्यसैगरी, हिमालयन बैंकले गत आर्थिक वर्ष २०७८/७९ को मुनाफाबाट ८ प्रतिशत बोनस सेयर र कर प्रयोजनसहित ११.११ प्रतिशत नगद गरी कुल ११.११ प्रतिशत लाभांश प्रस्ताव गरेको छ । उक्त लाभांश पारित गर्न बैंकले पुस २८ गते वार्षिक साधारण सभा बोलाएको छ ।
त्यस्तै, गत वर्षको नाफाबाट बुटवल पावरले ५ प्रतिशत बोनस सेयर र ७.५ प्रतिशत नगद गरी कुल १२ प्रतिशत, नेपाल टेलिकमले ४० प्रतिशत नगद, महालक्ष्मी विकास बैंकले ४ प्रतिशत बोनस सेयर र कर प्रयोजनसहित ६.४७ प्रतिशत नगद गरी कुल १०.४७ प्रतिशत र सिद्धार्थ इन्स्योरेन्सले ९ प्रतिशत बोनस सेयर र कर तिर्न ०.४७ प्रतिशत नगद गरी ९.४७ प्रतिशत लाभांश प्रस्ताव गरेका छन् । यी सबै कम्पनीले पुसभित्रै साधरण सभा डाकेका छन् ।
सबै कम्पनीको साधरण सभाले पारित गरेपछि सेयरधनीले उक्त लाभांश पाउने छन् ।
