काठमाडौं । नेपाल स्टक एक्सचेन्जमा सूचीकृत कम्पनीहरु मध्येमा करिब १३ प्रतिशत कम्पनीहरु मात्र मार्जिन कारोबारका लागि योग्य रहेका छन् । नेप्सेले सार्वजनिक गरेको मार्जिन कारोबारका लागि योग्य धितोपत्र कम्पनीहरुको सूचीमा ३३ कम्पनीको नाम सार्वजनिक गरेको हो ।
हाल नेप्सेमा २४४ कम्पनीहरु सूचीकृत छन् । नेप्सेले सार्वजनिक गरेको योग्य कम्पनीको सूचीमा १२ वटा मात्र वाणिज्य बैंक रहेका छन् । त्यस्तै, ७ विकास बैंक, ९ लघुवित्त कम्पनी, ३ जलविद्युत, एक होटल र एक अन्य समूहका कम्पनी रहेका छन् ।
मार्जिन कारोबार सुविधा सम्बन्धी कार्यविधिमा कम्तिमा १० हजार शेयरधनी भएको, खुद सम्पत्ति चुक्ता पूँजी भन्दा कम नरहेको, पछिल्लो दुई आर्थिक वर्षमा कम्तिमा १० प्रतिशत लाभांश वितरण गरेको कम्पनी हुनु पर्दछ ।
यस्तै, दोस्रो बजारमा अघिल्लो आर्थिक वर्षभर कम्तिमा ८० प्रतिशत कारोबार दिनमा शेयर कारोबार भएको, आर्थिक वर्षको प्रथम ६ महिना भित्रै वार्षिक साधारण सभा सम्पन्न गरेको कम्पनीको शेयर मार्जिन कारोबारका लागि योग्य हुने व्यवस्था छ ।
सोही व्यवस्था बमोजिम रहेका कम्पनीहरुको शेयर आर्थिक वर्ष २०७६/७७ का लागि मार्जिन कारोबारका लागि योग्य रहेको नेप्सेले जारी गरेको सूचनामा उल्लेख छ ।
हालसम्म मार्जिन कारोबार सुविधा प्रदान गर्नको लागि नेप्सेबाट २१ वटा धितोपत्र दलाल व्यावसायी (ब्रोकर)हरुले अनुमती लिइसकेका छन । अनुमती पाएका केही ब्रोकरहरुले मार्जिन कारोबार समेत शुरु गरिसकेका छन् ।
