गैरआवासीय नेपाली संघ (एनआरएनए) को अध्यक्षमा कुमार पन्त विजयी भएका छन् । उनले प्रतिस्पर्धी कुल आचार्यलाई पराजित गर्दै संघको नवौँ विश्वसम्मेलनबाट अध्यक्षमा निर्वाचित भएका हुन् । गोरखा फुजेलका स्थायीबासिन्दा पन्त सन् १९९९ देखि जर्मनीमा व्यवसायरत् छन् । पन्त यसअघि दुई कार्यकाल एनआरएनएको आईसिसि उपाध्यक्ष बनिसकेका छन् ।
विजयी पन्तले कुल १ हजार २ सय १७ मत ल्याउँदा प्रतिस्पर्धी आचार्य १ हजार ७० मत ल्याएका छन् । बिहिबार भएको मतदानमा कुल २ हजार ३ सय ४१ मत खसेको थियो ।
उपाध्यक्षहरूमा बद्री केसी, सोनाम लामा, अर्जुनकुमार श्रेष्ठ, रविना थापा र मन केसी निर्वाचित भएका छन्। महासचिवमा डा. हेमराज शर्मा निर्वाचित भएका छन् भने सचिवमा गौरी जोशी र आरके शर्मा निर्वाचित भएका छन्। कोषाध्यक्षमा महेशकुमार श्रेष्ठ र सह-कोषाध्यक्षमा लोक दाहाल विजयी भएका छन्। निर्वाचन समितिले आधिकारीक परिणाम भने सार्वजनिक गरिसकेको छैन ।
तीन दिन अघि राष्ट्रपती विद्यादेवी भण्डारीले सम्मेलनको उद्घाटन गरेकी थिइन । सुरुमा इलेक्ट्रोनिक भोटिङ गर्ने तयारी भएपनि बुधबार विवाद भएपछि बिहिबार कागजी मतदान भएको थियो ।
इलेक्ट्रोनिक मतदानमा विवाद भएपछि केही प्रतिनिधि मतदाननै नगरी फर्केका थिए ।
