काठमाडौं । सरकारले ठेक्का लिएर काम अलपत्र पार्ने १२ निर्माण तथा सप्लायर्स कम्पनीलाई कालोसूचीमा राखेको छ ।
ठेक्का सम्झौता अनुसार काम नगरेको भन्दै सार्वजनिक खरिद अनुगमन कार्यालयले बुधबार एक सूचना जारी गर्दै १२ सप्लायर्स तथा निर्माण कम्पनीलाई कालोसूचीमा राखिएको जनाएको हो ।
कार्यालयले ती निर्माण कम्पनीलाई सार्वजनिक खरिद ऐन, २०६३ को दफा ६३ को उपदफा (१) बमोजिम १ देखि साढे २ वर्षका लागि कालोसूचीमा राखेको हो ।
कार्यालयले भारत सप्तकोशी जेभीलाई साढे २ वर्ष र हैग्रीभा/सिद्धि साइ प्रकाश जेभीलाई २ वर्षका लागि कालोसूचीमा राखेको छ । त्यसैगरी, हाइवे कन्स्ट्रक्शन, विधि बिल्डर्स, अनुकूल निर्माण सेवा लगायत १० कम्पनीलाई १ वर्षका लागि कालोसूचीमा राखिएको छ ।
कालोसूचीमा परेका कम्पनीले अब तोकिएको अवधिमासम्म सरकारी निकायको कुनै पनि खरिद तथा निर्माणका कार्यमा भाग लिन पाउनेछैनन् । कालोसूचीमा राख्नुभन्दा अगाडि सम्झौता भएका कार्य भने निरन्तर हुने कार्यालयले जनाएको छ।
