काठमाडौं । सिद्धार्थ इन्स्योरेन्सको साधरण सेयर कारोबार फुकुवा भएको छ । कम्पनीले सोमबार सेयर कारोबार फुकुवा गर्न नेप्सेमा निवेदन दिएसँगै कारोबार फुकुवा भएको हो ।
साधरण सेयरको कारोबार फुकुवा भए पनि संस्थापक सेयरको भने कारोबार रोक्का नै कायम रहने छ । फुकुवा भएसँगै मंगलबारदेखि इन्स्योरेन्सको साधरण सेयर दोस्रो बजारमा कारोबारमा आउने छ ।
सिद्धार्थ इन्स्योरेन्स हाल प्रिमियर इन्स्योरेन्ससँग मर्जर प्रक्रियामा रहेको छ । दुई कम्पनी बीच गत असार २७ गते मर्जर सम्बन्धी सम्झौता भएको थियो ।
नेपाल धितोपत्र बोर्डले मर्जर प्रक्रियामा रहेका कम्पनीको सेयर बढीमा १५ दिन मात्रै रोक्का हुने व्यवस्था गरेसँगै पछिल्लो समय मर्जर प्रक्रियामा रहेका कम्पनीहरुको धमाधम सेयर कारोबार फुकुवा हुन थालेको छ ।
