काठमाडौं । वैदेशिक रोजगारी नेपालीको बाध्यता बनेको छ । स्वदेशमै रोजगारीको अवसर नपाएर औसतमा दैनिक २ हजार बढी विदेशिरहेका छन् ।
यसैक्रममा, चालु आर्थिक वर्षको असोजमा मात्रै ६२ हजार बढीले विदेश जानका लागि श्रम स्वीकृति लिएका छन् ।वैदेशिक रोजगार विभागको तथ्यांक अनुसार असोजमा ६२ हजार ७०७ जनाले पहिलो श्रम स्वीकृति लिएका हुन् ।
विभागका अनुसार ५७ हजार २९६ जना पुरुष र ५ हजार ४१० जना महिलाले श्रम स्वीकृति लिएका हुन् । श्रम स्वीकृति लिएका कामदारहरुमा दक्ष, अर्धदक्ष, पेशागत, सिप भएका र सीप नभएका कामदारहरुको संख्या रहेको छ ।
वैदेशिक रोजगारीका लागि श्रम स्वीकृति लिएकाहरुमा उच्चदक्ष कामदारको संख्या १४, पेशागत कामदारको संख्या १०९, अर्धदक्ष कामदारको संख्या ४ हजार २१६ सीपयुक्त कामदारको संख्या ३९ हजार ७९० र सीप नभएका कामदारहरुको संख्या १८हजार ५७७ रहेको तथ्याङकमा उल्लेख छ ।
असोजमा कतारमा ९ हजार ८४५, यूएईमा ७ हजार ८४५, साउदी अरेबियामा ६ हजार ५३६, कुवेतमा ३ हजार ४९७ र कोरियामा १ हजार ९१८ जना नेपाली श्रमिक पुगेका छन् ।
असोज महिनाको तथ्यांकअनुसार ३७ हजार ४१२ जना श्रमिकलाई म्यानपावर कम्पनीले नै भिसा प्रक्रिया पूरा गरेर विदेश पठाएका छन् । बाँकी भने श्रम स्वीकृति नवीकरण तथा व्यक्तिगत किसिमका श्रम स्वीकृतिबाट विदेश गएका हुन् ।
