काठमाडौं । रेमिट्यान्स सेवा प्रदायक कम्पनी आइएमई लिमिटेडले सर्वसाधारणमा प्राथमिक सेयर (आइपीओ) जारी गर्ने भएको छ ।
कम्पनीले आइपीओ जारी गर्ने विशेष प्रस्तावसहित आगामी मंसिर १६ गते २२ औं साधरण सभा डाकेको छ । कम्पनीको सभा होटेल ले हिमालय, लाजिम्पाट, काठमाडौंमा हुनेछ ।
कम्पनीले सभामा लेखापरीक्षकको प्रतिवेदन सहितको आव २०७८/७९ को वासलात, आव २०७८/७९ को वार्षिक प्रतिवेदन पारित गर्ने, आर्थिक वर्ष २०७९/८० का लागि लेखापरीक्षक नियुक्ति गर्ने, निजको पारिश्रमिक तोक्ने र संचालक समितिको गठन गर्ने लगायतका प्रस्तावहरु पनि सभामा लैजाने भएको छ ।
साधारणसभाले आइपीओ सम्बन्धी विशेष प्रस्ताव पारित गरेपछि लगत्तै निष्काशनको प्रक्रिया अघि बढाइने कम्पनीले जनाएको छ ।
आइएमई नेपालकै सबैभन्दा ठूलो रेमिट्यान्स कम्पनी हो । आइएमईले हाल विश्वका २०० बढी देशबाट विप्रेषण सेवा दिँदै आएको छ । कम्पनीको विश्वभर १० लाखभन्दा बढी स्थानहरूमा फैलिएको नेटवर्क छ ।
आइएमईमा व्यवसायी तथा उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालको मुख्य लगानी रहेको छ ।
