काठमाडौं । जीवन विकास लघुवित्त वित्तीय संस्थाको खुद नाफामा गिरावट आएको छ । लघुवित्तले शुक्रबार सार्वजनिक गरेको चालु आर्थिक वर्षको पहिलो त्रैमासको अपरिष्कृत वित्तीय विवरण अनुसार खुद नाफा १६.४० प्रतिशतले घटेको छ ।
लघुवित्तले चालु आवको असोज मसान्तसम्ममा १४ करोड ७६ लाख रुपैयाँ खुद नाफा कमाएको छ । यो गत वर्षको सोही अवधिको तुलनामा ३ करोड रुपैयाँ कम हो । लघुवित्तले गत वर्षको पहिलो त्रैमासमा १७ करोड ६६ लाख खुद नाफा कमाएको थियो ।
खुद ब्याज आम्दानी बढे पनि सञ्चालन नाफा घट्दा र कर्जा असुन नहुन नसक्दा प्रोभिजनिङ गर्नुपर्ने रकम बढेसँगै नाफामा गिरावट आएको हो ।
समीक्षा अवधिमा लघुवित्तको खुद ब्याज आम्दानी ५.९४ प्रतिशत बढेर ४० करोड ६२ लाख रुपैयाँ पुगेको छ । सञ्चालन मुनाफा भने २०.९४ प्रतिशतले घटेर १२ करोड ५१ लाखमा सीमित भएको छ ।
समीक्षा अवधिमा लघुवित्तले ९ अर्ब ७६ करोड निक्षेप संकलन र १० अर्ब सापटी लिई कुल २४अर्ब २६ करोड ऋण लगानी गरेको छ । हाल १ अर्ब ३ करोड रुपैयाँ चुक्ता पूँजी रहेको लघुवित्तको जगेडा कोषमा १ अर्ब ६८ करोड रुपैयाँ संचित छ ।
नाफामा गिरावट आएसँगै लघुवित्तको प्रतिसेयर आम्दानीमा ठूलो गिरावट आएको छ । समीक्षा अवधिमा लघुवित्तको प्रतिसेयर आम्दानी ११६.११ रुपैयाँबाट घटेर ५७.१० रुपैयाँमा झरेको छ ।
यस्तै, प्रतिसेयर नेटवर्थ २८३.९२ रुपैयाँ, मूल्य आम्दानी अनुपात ४३.८२ गुणा र खराब कर्जा १.१२ प्रतिशत रहेको छ ।