काठमाडौं । नेपालमा फूलको उत्पादन वर्षेनी बढ्दै गएको छ । मागसँगै उत्पादन पनि वर्षेनी करिब १० प्रतिशतले बढ्दै गएको फ्लोरिकल्च एशोसिएसन नेपालले जनाएको छ ।
मुख्यगरी सयपत्री फूलको माग र उत्पादन वर्षेनी १० प्रतिशतले वृद्धि भएको फ्लोरिकल्च एशोसिएसन नेपालका अध्यक्ष मिनबहादुर तामाङले बताए ।
गत वर्षको तिहारमा करिब १८.१५ लाख व्यावसायिक सयपत्री फूलको माला खपत भएको थियो । अघिल्लो वर्ष खपत भएको तुलनामा यस वर्ष समग्रीमा १० प्रतिशतले सयपत्री फूलको मागमा वृद्धि हुने अनुमान गरिएको छ । यस वर्षको तिहारमा २० लाख सयपत्री, ४ लाख २५ हजार मखमली र २० हजार गोदावरी फूलको माला गरी करिब २४ लाख ४५ हजार माला खपत हुने अनुमान गरिएको छ ।
उनका अनुसार यो वर्षको तिहारमा मखमली फूलको थोक मूल्य ४० रुपैयाँ प्रति माला रहने छ । खुद्रा मूल्यमा यसको मूल्य ५० देखि ६० रुपैयाँ पर्न सक्ने अनुमान गरिएको छ । सयपत्री फूलको मालाको थोक मूल्य यो वर्षको तिहारमा ५५ रुपैयाँ पर्ने उनले बताए । खुद्रा बजारमा मालाको मूल्य ६० देखि ७० रुपैयाँ माथि पुग्ने छ । गोदावरी फूलको मालाको मूल्य साइज हेरेर १०० देखि २ हजारसम्म पर्ने उनले बताए ।
‘मालाको थोक मूल्य यो वर्ष मखमली ४० र सय पत्रीको ५५ रुपैयाँ तोकेका छाँै, खुद्रामा कति पर्छ त्यो बजारमा पुगेपछि थाहा हुन्छ,’ तामाङले चाणक्य पोष्टसँग भने ‘गोदावरीको माला साइज हेरेर सय देखि २ हजार पर्ने सम्म हुन्छ ।’
सातै प्रदेशको विभिन्न क्षेत्रमा व्यवसायिक रुपमा सयपत्री फूलको खेती भइरहेको छ। जसमध्ये काठमाडौं, भक्तपुर, ललितपुर, धादिङ, चितवन, काभ्रे, सिन्धुपाल्चोक, नुवाकोट, गोर्खा, मकवानपुर, रामेछाप, इलाम रहेको छ ।
साथै धनकुटा, सुनसरी, मोरङ, धनुषा, सर्लाही, सप्तरी, रुपन्देहि, कास्की, स्याङजा, बाँके, पाल्पा, तनहु, दाङ, कैलाली लगायतका जिल्लामा पनि सयपत्री फूलको व्यवसायीक खेती हुँदै आएको छ ।
मखमली फूल उत्पादन हुने जिल्ला
मखमली फूलको उत्पादन नेपालका केही भागमा मात्र हुने गर्छ । यो फूल विशेष गरी काठमाडौं उपत्यकाको भक्तपुरको गुण्डु, काठमाडौंको इच्ंगुनारायण, ललितपुरको गोदावरी बडिखेल, कैलाली, पाल्पा, धादिङ र इलाम लगायतका क्षेत्रमा हुने गर्छ ।
