काठमाडौं । नेपाल राष्ट्र बैंकले ५६ करोड रुपैयाँ मुद्दती निक्षेपमा राख्ने भएको छ । राष्ट्र बैंकले उत्पादन तथा पेन्सन कोषमा रहेको उक्त रकम बैंक तथा वित्तीय संस्थामा मुद्दती निक्षेपमा राख्ने भएको हो ।
कुल ३६७ दिनका लागि उक्त रकम मुद्दती निक्षेपमा राखिने केन्द्रीय बैंकले जनाएको छ । राष्ट्र बैंकले उक्त रकम मुद्दतीमा राख्न इच्छुक बैंकहरुलाई प्रस्ताव आह्वान गरेको छ ।
कुल ५६ करोड मध्ये ४४ करोड ८० लाख रुपैयाँ निक्षेप वाणिज्य बैंक, ८ करोड ४० लाख रुपैयाँ विकास बैंक र २ करोड ८० लाख रुपैयाँ वित्त कम्पनीमा राख्ने राष्ट्र बैंकले जनाएको छ ।
इच्छुक बैंक तथा वित्तीय संस्थाले लिन चाहेको रकम र दिने ब्याजदर समेत खुलाएर आवेदन दिनुपर्नेछ । राष्ट्र बैंकका अनुसार असोज २६ गतेसम्म आवेदन दिन सक्नेछन् ।
निक्षेप लिन चाहने बैंक तथा वित्तीय संस्था न्यूनतम पूँजीकोष कामय गरेका, निष्क्रिय कर्जा ५ प्रतिशत भन्दा कम भएको, सञ्चालनमा आएको २ वर्ष नाघेको, सञ्चालन मुनाफामा भएको, सीडी रेसिया राष्ट्र बैंकले तोकेअनुसार कायम गरेको हुनुपर्नेछ ।
