काठमाडौं । नेपाल आयल निगमले दशैं बिदामा पेट्रोलियम पद्धार्थ अभाव हुन नदिन आफ्ना डिपोहरू खुला राख्न निर्देशन दिएको छ ।
दशैंको बेला पेट्रोलियम पदार्थको सहज आपूर्तिका लागि निगमले देशका विभिन्न ठाउँका १३ वटा डिपोहरू खुला राख्ने भएको हो ।
अन्य समयकोभन्दा दशैंमा सवारीको चाप बढ्ने भएकाले त्यसलाई मध्येनजर गर्दै सबै पेट्रोलपम्महरू खुल्ने निगमले जनाएको छ । पप्पहरूलाई सहजै तेल आपूर्ति गराउन बिदाका दिनमा पनि १३ वटा डिपोहरू खुला हुने निगमको भनाइ छ ।
निगमका अनुसार प्रदेश १ को विराटनगर र मधेश प्रदेशको अमलेखगंजमा डिपो असोज १६, २९ र २१ गते खुला हुनेछ । यसैगरी, वाग्मतीको थानकोट र गण्डकीको पोखरा डिपो असोज १५, १६, १८ र २१ गते खुल्नेछ ।
यस्तै, लुम्बिनीको भैरहवा डिपो असोज १५, १६, १७, २१ र २२ गते, कर्णालीको सुर्खेत डिपो असोज १६ र २१ गते र सुदूरपश्चिमको धनगढीमा डिपो असोज १६, १७ र २१ गते खुला हुने निगमले जनाएको छ ।
यसैगरी, शाखा कार्यालय चारआलीमा १६ र २१ गते, नेपालगंज, धनुषा, वीरगंज, दाङ र दिपायलमा पनि २१ गतेसम्म निगमको डिपोहरू खुला हुनेछन्।
