काठमाडौं । सेयर बजारमा सामान्य बढोत्तरी भएको छ । मंगलबार १६ अंकले बढेको नेज्से आज ६ अंकले बढेको हो ।
सूचकमा सुधार आए पनि कारोबार रकममा भने गिरावट आएको छ । अघिल्लो दिनको तुलनामा कारोबार रकम १८ करोडले घटेर जम्मा ४८ करोडमा सीमित भएको छ ।
बुधबार नेप्से परिसूचक ६.४१ अंकले बढेर १८३७.४६ बिन्दुमा पुगेको छ । यसदिन २२१ कम्पनीको ४८ करोड ५४ लाख ८ हजार ७६८ रुपैयाँ बराबरको १३ लाख ७० हजार ४७७ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये ९ उपसमूहको परिसूचक बढेको छ भने ४ समूहको घटेको छ । माइक्रोफाइनान्स समूहकाे परिसूचक सबैभन्दा धेरै ०.९६ प्रतिशतले बढेको छ ।
आज नेशनल माइक्रोफाइनान्सको प्रमोटर सेयर सर्वाधिक कारोबार भएको छ । यसको पौने ५ करोड बढीको सेयर किनबेच भएको छ । त्यस्तै, नबिल बैंक साढे २ करोड र रिडी पावर २ करोड बढीको कारोबार हुँदै शीर्ष तीनमा रहे ।
बुधबार मन्दाकिनी हाइड्रोपावरको सेयर मूल्य सबैभन्दा धेरै ९.२० प्रतिशतले बढेको छ । त्यसैगरी, अभियान लघुवित्त ८.१९, सपोर्ट माइक्रोफाइनान्स ७.८०, न्यादी हाइड्रोपावर ५.३९, पञ्चकन्यामाइ हाइड्रो ४.२३, विजया लघुवित्त ४.२०, सामलिङ पावर, आरएसडीसी लघुवित्त र गणपति लघुवित्तको सेयर मूल्य ३ प्रतिशतभन्दा धेरैले बढेको छ ।
