काठमाडौं । दशैं सुरू भएसँगै स्मार्टफोन कम्पनीहरूले छुट तथा आकर्षक अफर सार्वजनिक गर्न थालेका छन् । कम्पनीहरूले व्यापार बढाउन विभिन्न अफरहरू सार्वजनिक गर्न सुरू गरेका हुन् ।
दशैंमा मानिसको चहलपहल र किनमेल बढ्ने गरेको छ । जसको कारण व्यापार विस्तारको लक्ष्य भेट्टाउन यस अवधिलाई कम्पनीहरूले उपयुक्त मौकाको रुपमा लिने गरेका छन् ।
नेपालमा सबैभन्दा धेरै सामसङ, ओपो, रेडमी, रियलमी, भिभो, साओमी, पोको लगयत ब्रान्डका स्मार्टफोनहरू विक्री हुने गरेका छन् । बजार विस्तारमा प्रतिस्पर्धा गरिरहेका यी कम्पनी बीच ग्राहक तान्ने होड चल्ने गरेको छ ।
रियलमीको ‘उत्सवको बहार, हरेक दिन उपहार’
टेक्नोलोजी ब्रान्ड रियलमीले विजयादशमी, दिपावली तथा छठको अवसरमा ‘उत्सवको बहार हरेक दिन उपहार’ योजना ल्याएको छ । असोज १० गतेबाट सुरू भएको यो अफरमा उपभोक्ताहरूले स्मार्टफोन, टीभी, वाशिङ मसिन लगायत अन्य आकर्षक उपहारहरू जित्न सक्नेछन् ।
यो योजना अन्तर्गत कात्तिक १४ सम्म हरेक दिन ४ जना, हरेक हप्ता २ जना र बम्परमा ३ जना भाग्यशाली उपभोक्ताहरू छानिने कम्पनीले जनाएको छ । यसरी छानिएका विजेताहरू मध्ये हरेक हप्ता २ जनाले रियलमी सी ३० स्मार्टफोन जित्न सक्नेछन् भने ३ जना बम्पर विजेताले रियलमी ९, वाशिङ मसिन र ६५ इन्चको फोके टीभी जित्न सक्नेछन् ।
योजनामा सहभागी हुन रियलमी क्याम्पी एन्स डटकममा गएर आफ्नो नाम, फोन नम्बर, खरिद गरेको स्मार्टफोनको आइएमइआइ नम्बर र मोडल नम्बर जस्ता विवरणहरू राखेर दर्ता गर्न सकिने कम्पनीले जनाएको छ ।
साओमीको छुट अफर
स्मार्ट फोन ब्रान्ड साओमीले दशैं लक्षित ग्राहकहरूका लागि छुट अफर ल्याएको छ । कम्पनीले आफ्नो मोबाइल सेटहरूमा मूल्य घटाएको जनाएको छ । साओमी नेपालका कन्ट्री जेनरल म्यानेजर अमित पंडाले दशैंको अवसरमा उपभोक्ताको लागि साबिककोभन्दा कम मूल्यमा मोबाइल फोन उपलब्ध गराइरहेको बताए ।
यो अफर अन्तर्गत उपभोक्ताहरूले रेडमी नोट ११ सिरिजमा १००० रुपैयाँ र रेडमी नोट १२ सिरिजमा ३००० सम्मको छुटमा स्मार्टफोन खरिद गर्न सकिने कम्पनीले जनाएको छ । यो अफर सिमित असोज २ गतेदेखि कात्तिक १७ सम्म लागू हुनेछ ।
सामसुङको ‘यो वर्षको दशैं उपहार, डेली टिभी ड्याम्मै कार’
ग्राहकहरूको आकर्षणका लागि सामसुङले दशैंमा विभिन्न अफर सार्वजनिक गरेको छ । कम्पनीले आफ्नो ब्रान्डको कुनै पनि स्मार्ट फोन वा ट्याब खरिद गर्दा ग्राहकलाई हरेक दिन सामसुङ टीभी उपहारको व्यवस्था गरेको जनाएको छ । यसैगरी, ग्राहकले बम्पर उपहारमा कार जित्न सक्नेछन् ।
दक्षिण कोरियाको स्मार्ट फोन उत्पादन कम्पनी सामसुङ नेपाली उपभोक्ताको रोजाइमा पर्ने गरेको छ । यो कम्पनीका स्मार्ट फोन सबैभन्दा धेरै विक्री हुने मध्यमा पर्छन् ।
ओपो सित्तैमा जित्ने मौका
यस स्मार्ट फोन कम्पनीले दशैंको अवसरमा ग्राहकलाई सित्तैमा मोबाइल जित्न सक्ने अफर ल्याएको छ । ओपो स्मार्ट फोन खरिद गरिसकेपछि ग्राहकले कम्पनीको क्यूआर स्क्यान गर्नुपर्नेछ । जसमा ग्राहकले सित्तैमा एक स्मार्टफोन जित्ने मौका पाउने छन् ।
यो छुट दशैंतिहारको अवधिसम्म कायम रहने कम्पनीले जनाएको छ । यसैगरी, नोकियाले दशैंमा लक्किी ड्र अन्तर्गत स्मार्टफोन जित्न सकिने अफर ल्याएको छ ।
कम्पनीका अनुसार यस योजनामा सहभागी हुन ग्राहकले मोबाइल सेट खरिद गर्नुपर्ने छ । जसमा ग्राहकले नोकिया जी ११ प्लस, सी २१ प्लस,सी ३०,सी २०,जी २० लगायत जित्ने मौका पाउने कम्पनीले जनाएको छ ।
