काठमाडौं । तरलता अभाव झेलिरहेका बैंकहरुलाई केही राहत मिलेको छ । पछिल्लो एक सातामै बैंकिङ प्रणालीमा ४० अर्ब निक्षेप थपिएसँगै झिनो राहत मिलेको हो ।
चालु आर्थिक वर्षको साउनदेखि नै लगातार घट्दै गएको निक्षेप भदौमा भने सुधार आएको हो । साउनमा १ खर्ब बढी निक्षेप बाहिरिएकोमा भदौम आधा खर्ब निक्षेप थपिएकाे छ ।
नेपाल बैंकर्स संघका अनुसार भदौ महिनाको अन्तिम साता मात्रै वाणिज्य बैंकहरुले ४०.५४ अर्ब निक्षेप संकलन गरेका छन् । भदौ २४ गतेसम्म बैंकहरुको कुल निक्षेप ४४ खर्ब ४५ अर्ब रुपैयाँ रहेकोमा ३१ गते आइपुग्दा बढेर ४४ खर्ब ८६ अर्ब पुगेको संघले जनाएको छ ।
एक साताको अवधिमा स्वदेशी मुद्राको निक्षेप ४०.४० अर्ब रुपैयाँ र विदेशी मुद्राको निक्षेप १४ करोड रुपैयाँ बढेको छ । समग्रमा भदौ महिनामा बैंकहरुमा ५२ अर्ब १५ करोड रुपैयाँ निक्षेप थपिएको छ।
निक्षेपमा सुधार आएसँगै कर्जा विस्तारमा पनि केही सधार आएको छ । पछिल्लो एक् साताको अवधिमा बैंकहरुले २.२० अर्ब कर्जा लगानी गरेका छन् । भदौ २४ सम्म बैंकहरुले कुल ४१ खर्ब ८८ अर्ब कर्जा लगानी गरेकोमा भदौ ३१ आइपुग्दा बढेर ४१ खर्ब ९० अर्ब रुपैयाँ पुगेको छ ।
समग्रमा भदौ महिनामा बैंकहरुले १३ अर्ब रुपैयाँ कर्जा विस्तार गरेका छन् ।
