काठमाडौं । वाणिज्य बैंकहरुले ६ महिनापछि निक्षेपको ब्याजदर बढाएका छन् ।
बिहीबार बसेको नेपाल बैंकर्स संघको बैठकले फागुनदेखिको भद्र सहमति खारेज गरी स्वतन्त्र रुपमा ब्याजदर निर्धारण गर्ने निर्णय गरेसँगै बैंकहरुले निक्षेपको ब्याज बढाएका हुन् ।
बैंकहरुले असोज महिनाको लागि सार्वजनिक गरेको ब्याजदर अनुसार अधिकांशले मुद्दती निक्षेपको ब्याजदर बढाएर १२.१३ प्रतिशत पुर्याएका छन् । फागुनदेखि बैंकहरुले मुद्दती निक्षेपमा ११.०३ प्रतिशत ब्याजदर दिँदै आएका थिए ।
यस्तै, बैंकहरुले संस्थागत निक्षेपको ब्याजदर पनि ९.०३ प्रतिशतबाट बढाएर १०.१३ प्रतिशत पुर्याएका छन् । यसैगरी, रेमिट्यान्स निक्षेपको ब्याजदर १२.०३ प्रतिशतबाट बढाएर १३.१३ प्रतिशत पुर्याएका छन् । प्रभु बैंकले भने ३ महिना वा सो भन्दा बढी अवधिको ‘प्रभु उन्नति मुद्दति’ मा १५.१३ प्रतिशतसम्म ब्यादर दिने जनाएको छ ।
नेपाल राष्ट्र बैंकले मौद्रिक नीतिमार्फत नै नीतिगत बैंकदर बढाउँदै बैंकहरुलाई ब्याजदर बढाउन प्रोत्साहन गरेको थियो । राष्ट्र बैंकले उक्साए पनि साउन र भदौमा ब्याज नबढाएका बैंकहरुले असोजमा भने निक्षेपको ब्याज बढाएका हुन् ।
निक्षेपको ब्याज बढेसँगै अब बैंकहरुको आधारदर (बेसरेट) महँगिने हुँदा कर्जाको ब्याज समेत बढ्ने छ ।
कुन बैंकले कति दिन्छन् ब्याज ?
एनएमबी बैंकले व्यक्तिगत अवधि निक्षेपमा १२.१३ प्रतिशत, संस्थागत सावधि निक्षेप १०.१३ प्रतिशत, सामान्य बचतमा ९.१३ प्रतिशत (अधिकतम) ब्याज दिने भएको छ ।
यसैगरी, सिभिल, प्राइम कमर्शियल बैंक, सिद्धार्थ, सानिमा व्यक्तिगत अवधि निक्षेप १२.१३ प्रतिशत, संस्थागत अवधि निक्षेप १०.१३ प्रतिशत, बचत ९.१३ प्रतिशत (अधिकतम) ब्याज दिने भएको छ ।
यस्तै, नबिल बैंकले व्यक्तिगत अवधि निक्षेपमा १२.१३ प्रतिशत, संस्थागत अवधि निक्षेपमा १०.१३ प्रतिशत र बचतमा १०.१३ प्रतिशत (अधिकतम) ब्याज दिने भएको छ ।
सेन्चुरी, एनसीसी, नेपाल एसबीआई, लक्ष्मी, नेपाल इन्भेष्टमेन्ट, राष्ट्रिय बानिज्य बैंक, सनराइज, स्ट्यान्डर्ड चार्टर्ड, माछापुच्छ्रे, हिमालयन, ग्लोबल आईएमई बैंक र नेपाल बैंकले व्यक्तिगत अवधि निक्षेप १२.१३ प्रतिशत, संस्थागत अवधि निक्षेप १०.१३ प्रतिशत र बचतमा ७.१३ प्रतिशत (अधिकतम) ब्याजदर दिने भएका छन् ।
यस्तै, प्रभु बैंकले व्यक्तिगत साविक निक्षेप १२.१३ प्रतिशत, संस्थागत अवधि निक्षेप १०.१३ प्रतिशत, सामान्य बचत १०.१३ (अधिकतम), प्रभु उन्नति मुद्दती एफडीमा १२.०३ प्रतिशत पुर्याएको छ ।प्रभुले ३ महिना वा सो भन्दा बढी अवधिको ‘प्रभु उन्नति मुद्दति’ मा १५.१३ प्रतिशतसम्म ब्यादर दिने जनाएको छ ।
यस्तै, मेगा बैंकले व्यक्तिगत अवधि निक्षेपमा १२.१३ प्रतिशत, संस्थागत अवधि निक्षेपमा १०.१३ प्रतिशत, मेगा मातृभूमि बचत खाता १०.१३ प्रतिशत र सामान्य बचतमा ७.६३ प्रतिशत ब्याजदर दिने भएको छ ।