काठमाडौं । अर्थमन्त्री जनार्दन शर्माले एशियाली विकास बैंकलाई नेपालको निीज क्षेत्रलाई सहुलियत पूर्ण ऋण उपलब्ध गराउन आग्रह गरेका छन् । उनले नेपाली निजी क्षेत्रलाई प्रोत्साहन गर्न सहुलियत पूर्ण कर्जा दिन प्रस्ताव गरेका हुन् ।
एशियाली विकास बैंकका उपाध्यक्ष अशोक लाभाषासँग कुराकानी गर्दै मन्त्री शर्माले प्रदेशगत सन्तुलन गरेर सहयोग बढाउँदा नेपालको ग्रामीण अर्थतन्त्रको विकास हुने बताए । उनले भने ‘निजी क्षेत्र नेपालको आर्थिक उन्नतिको इन्जिन भएकाले सरकारले उक्त क्षेत्रको विकासलाई उच्च प्राथमिकतामा राखेको छ ।’
उनले नेपाल २०२६ सम्ममा अतिकम विकसित देशबाट स्तरोन्नति हुँदै गरेको हुनाले उक्त लक्ष्य हासिल गर्न निजी क्षेत्रको योगदान महत्वपूर्ण हुने पनि बताए । उनले नेपालले जलवायु परिवर्तनमा कुनै योगदान नगरेपनि त्यसको मार भने खेपिरहेको बताउँदै नेपालमा हरित अमोनिया, हाइड्रोजन जस्ता बैकल्पिक उर्जा उद्योगमा सहयोग गर्न अनुरोध गरेका थिए ।
‘नेपालको ग्रामिण अर्थतन्त्रलाई माथि उठाउन शिक्षा, स्वास्थ्य, खानेपानी पूर्वाधार लगायतका क्षेत्रमा लगानी आवश्यक छ । त्यसको लागि एशियाली विकास बैंकको सहयोग अझै वृद्धि भए राम्रो हुन्थ्यो’, मन्त्री शर्माले भने ।
एसियाली विकास बैंकका उपाध्यक्ष अशोक लाभषाले आफुहरु नेपाल सरकार र नेपाली जनताको सहयोगका लागि सधैँ हातेमालो गर्न तयार रहेको बताए ।
