काठमाडौं । नेपाल विद्युत् प्राधिकरणले देशभरका ५१ स्थानमा चार्जिङ स्टेशन निर्माण गरिरहेको छ । काठमाडौं उपत्यकासहित देशका मुख्य राजमार्गमा निर्माण भइरहेको ती चार्जिङ स्टेशन २ महिना भित्र संचालनमा आउने भएका हुन् ।
आगामी दुई महिनाभित्र सबै चार्जिङ स्टेशन निर्माण सम्पन्न भई सञ्चालमना आउने प्राधिकरणका कार्यकारी निर्देशक कुलमान घिसिङले जानकारी दिए ।
उनले नेपाल प्रहरी र सशस्त्र प्रहरी बलसँग पनि प्राधिकरणले चार्जिङ स्टेशन निर्माणका लागि समझदारीपत्रमा हस्ताक्षर भइसकेको जानकारी दिँदै सबै क्षेत्रको साथ र सहयोगमा वातावरणको संरक्षण तथा बिजुली खपत अभियानसमेत अगाडि बढ्ने बताए।
देशको प्रमुख सहर तथा राजमार्गमा द्रुत सवारी चार्जिङ स्टेशनको स्थापना गरिनु आफैँमा सकारात्मक हस्तक्षेप भएको उनको भनाइ छ ।
कहाँ कहाँ राख्दै छ चार्जिङ स्टेशन
काठमाडौं उपत्यकामा सात वटा स्टेशन राखिने प्राधिकरणले जनाएको छ। जसअन्तर्गत रत्नपार्कम आजदेखि संचालनमा ल्याएको छ । चाँडै पुल्चोक, बल्खु, हल्चोक र त्रिभवन अन्तर्राष्ट्रिय विमानस्थलमा संचालनमा ल्याउँदै छ ।
त्यसैगरी, प्रदेश नम्बर १ को झापाका दमक, भद्रपुर, कन्काई, मोरङको विराटनगर र सुनसरीको इटहरीमा गरी पाँच स्थानमा चार्जिङ स्टेशन राखिनेछन्।
त्यस्तै, प्रदेश नम्बर २ को पर्साको वीरगञ्ज, बाराको सिमरा, रौतहटको चन्द्रनिगाहापुर, धनुषाको ढल्केबर तथा जनकपुरधाम, महोत्तरीको बर्दिबास र सप्तरीको राजविराज गरी सात स्थानमा चार्जिङ स्टेशन स्थापना हुनेछन्।
त्यसैगरी, वाग्मती प्रदेशमा धादिङको मलेखु, बीपी राजमार्गको सिन्धुली, मकवानपुरको हेटौंडा र चितवनको भरतपुरमा दुई–दुई वटा स्टेशन राख्ने भएको छ । मुग्लिन/कुरिनटारमा चार वटा र काभ्रेको बनेपामा एउटा गरी बागमतीमा १३ वटा स्टेशन स्थापना गरिने योजना छ।
त्यसैगरी, गण्डकी प्रदेशमा नवलपुर, तनहुँको दमौली, स्याङ्जामा एक/एक र कास्कीको पोखरामा तीन गरी ६ वटा स्टेशन रहनेछन्।
लुम्बिनी प्रदेशकाे नेपालगञ्ज, बुटवल, दाङको भालुवाङ, नवलपरासीको बर्दघाट/सुनवलमा दुई वटा स्टेशन रहनेछन्। कर्णाली प्रदेशको सुर्खेतमा एक र सुदूरपश्चिम प्रदेश अन्तर्गत कञ्चनपुरको महेन्द्रनगर, कैलालीको धनगढी र डडेल्धुरामा एक–एक गरी तीन वटा चार्जिङ स्टेशन राखिने विद्युत् प्राधिकरणले जनाएको छ।
प्राधिकरणले स्थापना गर्न लागेको चार्जिङ स्टेशनमा २६ वटा ठूला बस, माइक्रो, ट्रक, पिकअप तथा कार आदिको लागि चार्जर र २५ वटा साना ठूला कारका लागि चार्ज गर्न सकिने प्रणाली जडान हुनेछ । एउटा सवारीसाधन पूर्णरूपमा चार्ज हुनका लागि बढीमा डेढ घण्टासम्म लाग्ने कार्यकारी निर्देशक घिसिङले जानकारी दिए ।
डेढ घण्टामा पूर्ण चार्ज
प्राधिकरणले निर्माण गरिरहेको चार्जिङ स्टेशनको क्षमता ६० किलोवाट डिसी र २२ किलोवाट एसी रहेको छ । यद्यपि, १२० किलोवाट डिसीसम्म चार्ज गर्न सकिनेछ । नेपालमा उपलब्ध भएका सवारीसाधनमा रहेको व्याट्रीको क्षमताअनुसार कम्तीमा आधा घण्टादेखि डेढ घण्टासममा पूर्णरूपमा चार्ज हुनेछ ।
चार्जिङ स्टेशन निर्माणका संलग्न थ्री गो कम्पनीका कार्यकारी अध्यक्ष राजन रायमाझीले प्रतिचार्जिङ स्टेशन रु ८० लाख लागत लागेको जानकारी दिए । प्राधिकरणले प्रतिचार्जिङ स्टेशन निर्माणका लागि १ करोड २० लाख बराबरको बोलपत्र गरेको भए पनि सो कम्पनीले रु ८० लाखमा ठेक्का पाएको हो ।
दिगो भनेरसमेत चिनिने सो कम्पनीले चीनको वाङव्याङ कम्पनीको स्टार चार्जर भित्र्याएको छ । कम्पनीले देशका अन्य आठ स्थानमा आफ्नै लगानीमा चार्जिङ स्टेशनसमेत निर्माण गरिसकेको छ ।
प्राधिकरणको लगानी रहेको बल्खु, साझा यातायात, नक्साललगायतका स्थानमा चार्जिङ स्टेशन तयार भइसकेको छ । यसबाट पेट्रोलियम पदार्थको खपत क्रमशः घट्दै जाने विश्वास आफूहरूले लिएको कार्यकारी अध्यक्ष रायमाझीले जानकारी दिए ।
