काठमाडौं । मर्जर वा प्राप्तिमा गएका कम्पनीहरुको लागतको भारित औसत गणना सम्बन्धमा लगानीकर्ता अस्पष्ट पछि सीडीएस एन्ड क्लियरिङ लिमिटेड(सीडीएससी)ले थप प्रष्ट पारेको छ ।
अहिले कुनै पनि कम्पनीको गाभ्ने/गाभिने प्रक्रिया अगावै आफ्नो लागतको भारित औसत गणना नगरिएको अवस्थमा गाभिएको कम्पनीको लागत स्वतः १०० रुपैयाँ देखाउने गरेको छ । यसो हुँदा लगानीकर्ताले बढी पूँजीगत लाभकर तिर्नुपरेको भन्दै गुनासो गरेका थिए ।
त्यही लगानीकर्ताको गुनासोलाई मध्येनजर गर्दै सीडीएससीले समाधानको उपायसहित जानकारी गराएको छ ।
मर्जर/पाप्ति अगावै भारित औसत गणना नगरिएको अवस्थामा प्रणालीमा देखाइएको १०० रुपैयाँ ‘पर्चेज प्राइस’ परिमार्जन गरी लगानीकर्ताले आफ्नो वास्तविक लागत राख्नसक्ने सीडीएससीले जनाएको छ ।
यसो गर्न लगानीकर्ताले वास्तविक लागतको प्रमाण सम्बन्धी विवरण ‘रिमार्कस्’ मा राख्नुपर्नेछ । सोही विवरणको आधारमा लगानीकर्ताले तिर्नुपर्ने कर गणना हुने सीडीएसीले जानकारी गराएको छ ।
