काठमाडौं । अन्तराष्ट्रिय बजारमा यूरोपियन मुद्रा (यूरो)को भाउमा लगातार गिरावट आएको छ । रुस युक्रेन युद्ध र कोभिड पछाडिको आर्थिक मन्दीका कारण यूरो कमजोर हुँदै गएको छ ।
साथै, विश्व बजारमा डलर बलियो हुँदै जाँदा पनि यूरोको मूल्यमा प्रभाव परेको हो । २० वर्षपछि अमेरिकी डलर र यूरोको भाउ झन्डै बराबरी भएको छ । यूरो र अमेरिकी डलर बीचको विनिमय दर समानताबाट केहीमात्र टाढा रहेको छ ।
युरोपमा मन्दीको प्रचुर मात्रामा डर र उच्च मुद्रास्फीति तथा युक्रेनमा रूसको आक्रमणको कारण ऊर्जा आपूर्ति अनिश्चितताको कारण युरोको भाउ घटेको हो ।
राष्ट्र बैंकले मंगलबार डलरको लागि विक्रीदर १२८ रुपैयाँ १० पैसा छ भने खरिददर १२७ रुपैयाँ ५० पैसामा कायम भएको छ ।
त्यस्तै, आज युरोको विक्रीदर १२८ रुपैयाँ १९ पैसा छ भने खरिददर १२७ रुपैयाँ ५९ पैसा रहेको छ । १ साउन २०६५ मा डलरको अनुपातको यूरो सबैभन्दा महँगो भएको थियो । त्यसबेला डलरको भाउ ६९ रुपैयाँ थियो भने युरोको विनिमयदर १११ रुपैयाँ पुगेको थियो । २०५६ पुसदेखि २०५९ मंसिरसम्ममात्रै यूरोको भाउ डलरभन्दा सस्तो भएको थियो ।
१७ पुस २०५५ मा यूरोपेली संघका ११ सदस्य मुलुकले एकल मुद्रा प्रणाली सञ्चालन गर्ने भनेर युरो प्रचलनमा ल्याएका थिए ।
अहिले युरोपका १९ मुलुकले यो मुद्रालाई वैधानिक भुक्तानीको माध्यमक अर्थात् राष्ट्रिय मुद्रा मानेका छन् । जर्मनी, फ्रान्स, इटली, स्पेन, नेदरल्याण्ड्स, पोर्चुगल, ग्रीस, बेल्जियम, अस्ट्रिया, स्लोभाकिया, फिनल्याण्ड, आयरल्याण्ड, लात्भिया, स्लोभेनिया, इस्टोनिया, साइप्रस, लक्जम्बर्ग र माल्टा यूरोजोनका सदस्य छन् ।
यूरो कमजोर हुँदा नेपाली अर्थतन्त्रमा पनि प्रत्यक्ष प्रभाव पर्नेछ । युरोपेली देशबाट नेपालीले पठाउने रेमिट्यान्समा असर पर्ने देखिन्छ । यद्यपि, युरोपमा कति नेपाली छन् भन्ने तथ्यांक भने छैन् ।
