काठमाडौं । गत आर्थिक वर्ष वाणिज्य बैंककाे नाफामा सुधार आएसंगै वितरयाेग्य नाफा पनि बढेकाे छ ।
बैंकिङ प्रणालीमा देखिएकाे तरलता अभावका बाबजुत उल्लेख्य खुद नाफा आर्जन गर्न सफल बैंकहरूकाे वित्तीय स्थिति पनि सन्ताषजनक नै छ ।
गत वर्ष २६ वटा वाणिज्य बैंकहरूले औसतमा २३ प्रतिशत खुद नाफा बढाएका छन् भने वितरणयाेग्य नाफा १६ .१५ प्रतिशत रहेकाे छ ।
बैंकहरूले सार्वजनिक गरेकाे वित्तीय विवरण अनुसार असार मसान्तसम्ममा वाणिज्य बैंकहरुको समग्र नाफा ५६ अर्ब ७८ करोड ६६ लाख ४८ हजार रुपैयाँ रहेको छ । गत वर्ष तीन बैंक बाहेक सबैले नाफा बढाएका छन् ।
गत वर्ष सबैभन्दा धेरै नाफा कमाउनेमा सरकारी स्वामित्वको राष्ट्रिय वाणिज्य बैंक रहेकाे छ ।
निक्षेपको ब्याजदर वृद्धि, तरलता अभाव र आर्थिक गतिविधि सुस्ताएका बेला वाणिज्य बैंककाे नाफामा सुधार आएकाे छ ।
प्रकाशित अपरिष्कृत वित्तीय विवरण अनुसार औसतमा वाणिज्य बैंकहरूकाे १८.०९ प्रतिशत लाभांश बाँड्न सक्ने क्षमता रहेकाे देखिन्छ ।
वाणिज्य बैंककाे वितरणयाेग्य नाफा र शेयरधनी कोषमा रहेको रकमबाट गरेर साे लाभांश बाँड्न सक्ने भएका हुन् ।
कुन बैंककाे लाभांश बाँड्ने क्षमता कति ?
गत वर्ष एभरेष्ट बैंकको लाभांश वितरण गर्नसक्ने क्षमता सबैभन्दा धेरै रहेकाे छ। यस बैंकले कुल ४३.६७ प्रतिशत लाभांश वितरण गर्न सक्ने देखिन्छ ।
दाेस्राेमा नबिल बैंककाे ३९.९४ प्रतिशत लाभांश वितरण गर्नसक्ने क्षमता रहेकाे छ ।
बैंकिङ क्षेत्रमा लिड गरिरहेकाे यस बैंककाे नाफामा गत वर्ष भने केही संकूचन आएकाे देखिन्छ । यद्यपि, नेपाल बंगलादेश बैंकलाई गाभेर यस बैंकले आफ्नाे वित्तीय स्थिति बलियाे बनाउँदै लगेकाे छ ।
बंगलादेश बैंककाे प्रिमियम बापत आएको रकमलाई समेत वितरण योग्य नाफामा देखाएको कारण उसको लाभांश वितरण क्षमता राम्रो रहेकाे छ ।
यसैगरी, गत वर्ष लाभांश वितरण गर्न नपाएको एनआइसी एशिया बैंकको ३३.२६ प्रतिशत लाभांश वितरण गर्न सक्ने क्षमता रहेकाे देखिन्छ ।
अघिल्लो आवमा पुँजी काेष नपुगेकाे भन्दै यस बैंकलाई नेपाल राष्ट्र बैंकले लाभांश वितरणमा राेक लगाएकाे थियाे ।
लाभांश वितरण क्षमता सबैभन्दा कमजाेर सेञ्चुरी बैंककाे रहेकाे छ । यस बैंकले गत वर्ष ९.५४ प्रतिशत लाभांश बाँड्न सक्ने रहेकाे छ ।
यसैगरी, लक्ष्मी बैंकले १०.८७ प्रतिशत लाभांश बाँड्न सकन्ने क्षमता राख्छ ।
वित्तीय विवरण अनुसार सिभिल बैंकले ११.०९ प्रतिशत, नेपाल इन्भेष्टमेन्ट बैंकले ११.१३ प्रतिशत, सिटिजन्स बैंकले ११.२४ प्रतिशत र मेगा बैंकले ११.४४ प्रतिशत लाभांश बाँड्न सक्ने छन् ।
ग्लाेबल आईएमइ बैंककाे १३.४५,स्ट्यान्डर्ड चार्टर्ड ३०.८७,कृषि विकास २९.६३,नेपाल बैंक २४.७४,हिमालयन बैंक २०.६२,राष्ट्रिय वाणिज्य बैंक २०.३०,सिद्धार्थ १६.८२,एसबीआई बैंक १४.७४,सनराईज १४.४६,माछापुच्छ्रे १३.२५,एनसीसी १३.२३,एनएमबी १३.०३,सानिमा १२.९८,प्राईम १२.८१,कुमारी १२.६६,प्रभु १२.४३ र बीओके बैंकको १२.२५ प्रतिशत लाभांश वितरण क्षमता रहेकाे छ ।
