काठमाडौं । अन्तर्राष्ट्रिय बजारमा कच्चा तेलको मूलयमा निरन्तर गिरावट आएको छ । कच्चा तेलको मूल्य लगातार ओरालो लागेसँगै ६ महिना यताकै सस्तो भएको छ ।
विश्व बजारमा कच्चा तेलको मूल्य प्रतिब्यारेल ८८ डलरसम्म आइपुगेको छ । बिहीबार डब्लुयुटीआई क्रुड आयलको भाउ २.३ प्रतिशतले घटेर प्रतिब्यारेल ८८.५४ डलरसम्म आएको छ । जुन फेब्रुअरी यताकै सस्तो हो ।
त्यस्तै, डब्लूटीआई कच्चा तेलको भाउ प्रतिब्यारेल ९५.८७ डलर र ब्रेन्ट क्रुड आयलको भाउ ९४ डलरमा आएको छ ।
विश्वव्यापी आर्थिक मन्दी आउने हल्लाका कारण पछिल्लो समय अन्तर्राष्ट्रिय बजारमा तेलको भाउमा लगातार गिरावट आइरहेको छ ।
यसैबीच, बुधबार तेल निर्यातक देशहरूको समूह ओपेक प्लस अर्को महिनादेखि तेल उत्पादनमा वृद्धि गर्न सहमत भएसँगै तेलको भाउमा थप गिरावट आएको हो ।
ओपेकअन्तर्गतका १३ सहित तेल निर्यात गर्ने २३ देशहरुले सेप्टेम्बरमा प्रतिदिन थप १ लाख ब्यारेल तेल उत्पादन गर्ने बताएका छन् ।
रुसले युक्रेनमा आक्रमण सुरु गरेसँगै अमेरिका र युरोपेली देशहरुले रसियन तेलमा प्रतिबन्ध लगाएसँगै विश्व बजारमा तेलको भाउ प्रतिब्यारेल १३९ डलरसम्म पुगेकेा थियाे । तर, पछिल्लो समय युद्ध कायमै रहे पनि अन्य उत्पादक देशहरुले उत्पादन बढाउँदा मूल्यमा केही गिरावट आएको थियो ।
पछिल्लो एक महिना यता विभिन्न अध्ययनहरुले विश्वभर आर्थिक मन्दी आउने प्रक्षेपण गरेपछि तेलको खपतमा समेत केही गिरावट आएको छ । जसकारण कच्चा तेलको मूल्यमा गिरावट आउन थालेको छ ।
यदि विश्वव्यापी आर्थिक मन्दी आएमा यस वर्षको अन्त्यसम्म कच्चा तेलको भाउ प्रतिब्यारेल ६५ डलरसम्म आउने अमेरिकाको सिटी बैंकले चेतावनी दिएको छ ।
अन्तर्राष्ट्रिय बजारमा कच्चा तेलको भाउ घटेसँगै नेपाललाई पनि केही राहत मिल्ने देखिन्छ । नेपाल भारतबाट पेट्रोलियम पदार्थ खरिद गर्दै आएको छ । विश्व बजारमा तेलको भाउ घटेपछि भारतमा पनि घट्ने हुँदा नेपालमा पनि केही सस्तोमा आउने छ ।