काठमाडौं । फाइनान्स कम्पनी र विकास बैंकको सेयरमा लगानीकर्ताको उच्च आकर्षण देखिएको छ ।
गत शुक्रबार नेपाल राष्ट्र बैंकले मौद्रिक नीति सार्वजनिक गरेपछि यससाता (मंगलबार बाहेक) नेप्से उच्च अंकले बढिरहेको छ ।
बढ्दो बजारमा लगानीकर्ताको रोजाइमा फाइनान्स र विकास बैंकको सेयर परेको छ । नेप्सेमा १३ समूहका कम्पनी सूचीकृत भए पनि फाइनान्स र विकास बैंकको सेयरमा लगानीकर्ता झुम्मिएका छन् ।
अन्य क्षेत्रका कम्पनीको तुलनामा फाइनान्स र विकास बैंकको सेयरको माग उच्च छ भने आपूर्ति न्यून रहेको छ ।
अन्य क्षेत्रका कम्पनीको तुलनामा यी क्षेत्रका कम्पनीको सेयर संख्या कम हुने र बजार बढ्दा छिटै मूल्य बढ्ने भएकाले लगानीकर्ताहरु आकर्षित हुँदै आएका छन् ।
यद्यपि, सेयर संख्या थोरै हुने भएकाले स्वार्थ समूहले पनि सजिलै चलखेल गरी भाउ बढाउन÷ घटाउने गरेको बताइन्छ । बढ्दो बजारमा पनि चलखेल गरी भाउ बढाउने आशमा पनि लगानीकर्ता फाइनान्सको सेयरमा झुम्मिने गरेका छन् ।
यस सता धेरै मूल्य बढ्नेमा अधिकांश फाइनान्स कम्पनी रहेका छन् । केही फाइनान्स कम्पनीको सेयर मूल्यमा दैनिक १० प्रतिशतले बढ्दै अर्थात् पोजेटिभ सर्किट समेत लाग्दै आएको छ ।
यद्यपि, लाभांश प्रतिफल भने फाइनान्स कम्पनी र विकास बैंकको अन्य क्षेत्र (वाणिज्य बैंक, हाइड्रोपावर, बीमा) कम्पनीको हाराहारीमा रहने गरेको छ ।
