काठमाडौं । निर्जीवन बीमा कम्पनी शिखर इन्स्योरेन्स व्यवसाय विस्तारमा आक्रमक बनेको छ । देशको समग्र अर्थतन्त्र नै नकारात्मक दिशा उन्मुख रहे पनि कम्पनीले आफ्नो व्यवसायमा भने उच्च वृद्धि गर्न सफल भएको छ ।
गत आर्थिक वर्ष २०७८/७९ मा कम्पनीले प्रिमियम कलेक्शन २६.२० प्रतिशतले वृद्धि गर्न सफल भएको हो । कम्पनीले गत वर्ष ५ अर्ब १ करोड प्रिमियम संकलन गरेको छ । यो अघिल्लो आर्थिक वर्षको २०७७/७८ को तुलनामा १ अर्ब ४ करोड रुपैयाँ बढी हो । शिखरले सो वर्ष ३ अर्ब ९७ करोड प्रिमियम संकलन गरेको थियो ।
एकै वर्षमा ५ अर्ब प्रिमियम संकलन गर्ने शिखर पहिलो निर्जीवन बीमा कम्पनी समेत हो । एक आर्थिक वर्षमै ५ अर्ब प्रिमियम संकलन गर्दै शिखरले निर्जीवन बीमा क्षेत्रमा इतिहास रचेको छ । विगतदेखि नै निर्जीवन बीमा कम्पनीमा ‘मार्केट लिडर’ रहेको शिखरले आफ्नो वर्चश्व कायमै राखेको हो ।
पछिल्लो १७ वर्षमा शिखरले आफ्नो व्यवसाय ३७५३ प्रतिशतले विस्तार गर्न सफल भएको छ । सन् २००४/०५ मा जम्मा १३ करोड प्रिमियम संकलन गरेको शिखरले १७ वर्षमै प्रिमियम संकलन साढे ३८ गुणाले वृद्धि गरी ५ अर्ब पुर्याएको हो ।
गत वर्ष कम्पनीले कुल २ लाख ६२ हजार वटा पोलिसी विक्री गरेको छ । सो वर्ष ३ अर्ब बढी दाबी भुक्तानी गरेको छ कम्पनीले जनाएको छ ।
पछिल्लो समय अन्य कम्पनीहरु बीमा समितिले तोकेको चुक्ता पूँजी २ अर्ब ५० करोड पुर्याउन धमाधम मर्जरमा केन्द्रीत भइरहेका छन् । हाल २ अर्ब २८ करोड चुक्ता पूँजी रहेको शिखर लाभांशबाटै तोकेको चुक्ता पूँजी पुर्याउन सक्ने देखिन्छ ।
हाल मर्जरमा सम्झौता गरी नयाँ बन्ने कम्पनीले समेत शिखरलाई उछिन्न नसक्ने देखिन्छ । प्रिमियम संकलन, चुक्ता पूँजी, शाखा संजाल लगायत सूचकमा शिखर इन्स्योरेन्स नै अग्रपंक्तिमा रहने देखिन्छ ।
निर्जीवन तर्फ ‘नम्बर १’ रहँदै आएको शिखरको शाखा संजाल ६७ जिल्लामा ११० वटा पुगेको छ । हाल कम्पनीमा ६१९ कर्मचारी कार्यरत छन ्।