काठमाडौं । नेपाल धितोपत्र बोर्ड (सेबोन)ले थप ७ कम्पनीलाई योग्य संस्थागत लगानीकर्ता (क्यूआइआइ)को रूपमा काम गर्न अनुमति दिएको छ । सेबोनको नियमन तथा व्यवस्थापन विभागले असार २२ गते थप ७ संस्थाहरूलाई योग्य संस्थागत लगानीकर्ताको मान्यता दिएको हो ।
बोर्डबाट क्यूआइआइको मान्यता पाउने संस्थाहरूमा नबिल बैंक, एशियन लाइफ इन्स्योरेन्स, मेगा म्युचुअल फण्ड, एनआइसी एशिया सेलेक्ट ३०, एनआइसी एशिया फ्येक्सी क्याप फण्ड, सनराइज फर्स्ट म्युचुअल फण्ड र सनराइज ब्लूचिप फण्ड रहेका छन् ।
बोर्डबाट अनुमति पाएसँगै अब यी कम्पनीहरूले बुक बिल्डिङ विधिबाट जारी हुने कुनै पनि कम्पनीको प्राथमिक सेयर निष्काशनमा मूल्य निर्धारण प्रक्रियामा भाग लिन पाउने छन् । साथै, संस्थागत लगानीकर्ताका रूपमा समेत सेयर किनबेच गर्न पाउने छन्।
यी ७ सहित बोर्डबाट योग्य संस्थागत लगानीकर्ताको स्वीकृति पाउने कम्पनीको संख्या ११६ पुगेको छ । यसअघि १०९ कम्पनीले विभिन्न मितिमा योग्य संस्थागत लगानीकर्ताको मान्यता पाएका थिए ।
