काठमाडौं । काठमाडौं महानगरपालिकाले २५ वटा पार्क निर्माणको काम सम्पन्न गरेको छ । थप २२ वटा पार्कहरु निर्माणाधिन अवस्थामा रहेका छन् ।
महानगरको पूर्वाधार विकास शाखाका अनुसार चालु आवमा काठमाडौंका ३२ वडामा बन्दै गरेका पार्कहरु मध्ये २५ पार्कहरुको निर्माण सम्पन्न गरिएको हो ।
महानगरपालिका क्षेत्रभित्र रहेको सार्वजनिक जग्गामा उक्त पार्कहरु निर्माण भएका हुन् । पूर्वाधार शाखा प्रमुख राम थापाले विभिन्न स्थानमा रहेका खाली जग्गालाई पार्कको रुपमा विकास गरिएको बताए ।
‘अहिलेसम्म २५ वटा पार्क निर्माण भइसक्यो, असार भित्र थप पार्क पुरा हुन्छन्, अन्य बाँकी रहेका २२ वटा पार्क आगामी आर्थिक वर्षमा पुरा हुने छ,’ प्रमुख थापाले चाणक्य पोष्टसँग भने , ‘कुलेश्वर आवास भित्र १४ वटा पार्क बनाइसकेका छाँै । आवाश क्षेत्रभित्र खाली रहेका ठाउँमा पार्कको रुपमा विकास गरेका हौँ । ४ नम्बर वडामा व्यक्तिहरुले ओगटेर राखेका स्थानमा ४ वटा पार्क बनाएका छाँै । धुम्बराही क्षेत्रमा यी पार्कहरु बनेका हुन् ।’
१४ नमबर वडामा ८ वटा , ४ वटा ४ नं वडामा, ३ वटा ७ नम्बरमा, ६ नम्बरमा १, ११ नम्बार वडामा १, १५ नं वडामा २ वटा, ३ नम्बर वडामा १ वटा पार्कको निर्माण सम्पन्न भएको छ । ३१ नम्बर वडामा २ वटा पार्क सम्पन्न भएको महानगरले जनाएको छ ।
२ नम्बर वडाको कपुर धारामा, रानीबारीमा एउटा पार्क र एउटा १८ नम्बर वडामा पार्क निमार्ण सम्पन्न भएका हुन् । थापाका अनुसार यो असार महिना भित्र अझै केही पार्कहरु सम्पन्न हुने तयारीमा रहेका छन् ।
केही अन्तिम चरणमा छन् । २२ वटा पार्क निर्माणाधिन अवस्थामा छन् । ती सबै आगामी आर्थिक वर्षमा सम्पन्न हुने महानगरले जनाएको छ । महानगरका अनुसार चालु आर्थिक वर्षमा पार्क निर्माणका १० करोड रुपैयाँ हाराहारीमा खर्च भएको छ ।
यस वर्ष महानगरपालिकाले पार्क निर्माणका लागि ८० करोड रुपैयाँ बराबरको बजेट विनियोजन गरेको थियो । सो रकम मध्ये १४ प्रतिशत बजेट मात्र खर्च भएको हो ।
