काठमाडौं । सयपत्री हाइड्रोपावर लिमिटेडले प्राथमिक साधरण सेयर (आइपीओ) भर्ने म्याद थप गरेको छ । कम्पनीले तोकिएको समयमा माग अनुसार आवेदन नआएपछि समय थप गरेको हो ।
कम्पनीले असार २ गतेदेखि १६ गतेसम्मका लागि आइपीओ निष्कासन गरेको थियो । उक्त अवधिमा माग अनुसार आवेदन नपरेपछि समय थपेर असार २४ गतेसम्म पुर्याइएको छ ।
कम्पनीले आयोजना प्रभावित क्षेत्र बाग्लुङको ताराखोला गाउँपालिका र गल्कोट नगरपालिका वासिन्दाहरुका लागि आइपीओ जारी गरेको हो । कम्पनीले प्रतिकित्ता १०० रुपैयाँ दरले ३ करोड रुपैयाँ बराबरको ३ लाख कित्ता साधारण सेयर विक्रीमा ल्याएको हो ।
लगानीकर्ताले न्यूनतम १० कित्तादेखि अधिकतममा ३० हजार कित्ताका लागि आवेदन दिन सक्नेछन् । आइपीओमा एनआइबीएल एस क्यापिटल लिमिटेड, काठमाडौं, प्रभु बैंकको ताराखोला र गल्कोट शाखा, ग्लोबल आइएमई बैंकको गल्कोट शाखा र कामना सेवा विकास बैंकको गल्कोट शाखाबाट आवेदन दिन सक्नेछन् ।
यसका साथै नेपाल धितोपत्र बोर्डबाट स्वीकृतिप्राप्त सम्पूर्ण सी९आस्वा सदस्य बैंक तथा वित्तीय संस्था र तिनका शाखा कार्यालयबाट आवेदन दिन सकिनेछ ।
कम्पनीको सेयर निष्काशन तथा विक्री प्रबन्धक एनआइबीएल एस क्यापिटल लिमिटेड रहेको छ। कम्पनीको आइपीओलाई रेटिङ एजेन्सी इक्रा नेपालले ‘इक्रा एनपी आईआर डबल बी प्लस’ रेटिङ दिएको छ ।यसले कम्पनीको दायित्व बहन गर्ने क्षमतामा मध्यम जोखिम रहेको जनाउँदछ ।
कम्पनीले बाग्लुङको ताराखोला गाउँपालिका–२ र ३ मा पर्ने दरमखोलामा २।५ मेगावाट क्षमताको दरम खोला ‘ए’ जलविद्युत् आयोजना निर्माण सम्पन्न गरी विद्युत् उत्पादन समेत गरिहेको छ ।
