काठमाडौं । धोवीखोला करिडोर निर्माण सुरू भएको २३ वर्ष बितिसकेको छ । काठमाडौं महानगरपालिकाले सवारीको चाप घटाउन वैकल्पिक मार्गका रुपमा धोवीखोला करिडोरलाई २०५६ सालबाट निर्माण प्रक्रिया अगाडि बढाएको थियो ।
महानगर अन्तर्गतको काठमाडौं भ्याली म्यापिङ प्रोजेक्टबाट धोवीखोला कोरिडोर सुधार आयोजना सुरू भएको थियो । तर, त्यसमार्फत राम्रो काम नभएपछि २०६४ पुसमा आयोजनाको जिम्मा सरकारले नै लिएको थियो । अहिले उपत्यका विकास प्राधिकरणले धोवीखोला करिडोर निर्माणको काम हेरिरहेको छ ।
उपत्यका विकास प्राधिकरण अन्तर्गत जिल्ला आयुक्त कार्यालयका इन्जिनीयर सजन कुँवरले आयोजनाको ९५ प्रतिशत काम सम्पन्न भएको बताए । उनले २ स्थानमा मात्र केही प्राविधिक र स्थानीय समस्याका कारण करिडोरको काम सम्पन्न नभएको उनले बताए ।
उनका अनुसार बिजुलीबजार र बुढानिलकण्ठ गरी २ स्थानमा करिडोर निर्माणले राम्रो प्रगति गर्न नसकेको हो । बिजुली बजारको पश्चिममा स्थानीयले खोला डाइभर्सन गर्न दिएका छैनन् । बुढानिलकण्ठमा ९ मिटर ट्रयाक खोल्न नसकिएको हो ।‘बिजुली बजारमा चालु आवमै काम सक्ने भनेका छौं, बुढानिलकण्ठमा काम सकिन अझै अर्को वर्ष लाग्छ,’ कुँवरले चाणक्य पोष्टसँग भने ।
बुढानिलकण्ठको वडा २ मा प्राधिकरणले अझै ट्रयाक खुलाउन सकेको छैन । उक्त स्थानमा ९ मिटर ट्रयाक खोल्न नसकिने अवस्था सृजना भएको उनले बताए । उक्त स्थानमा ट्रयाक खोल्न कन्सलटेन्ड हायर गरे पनि बाढीको समस्या देखा परेको उनले बताए । उनले यथास्थितिमा बनाउने भए एकै वर्षमा काम सम्पन्न गर्न सक्ने भए पनि ९ मिटरमा ट्रयाक खोल्न खोज्ने हो भने समाधान निकाल्न अझै नसकिने उनले बताए ।
वारीपारी १२/११ किलोमिटर गरी कुल २४ किलोमिटर लम्बाइको यो सडक करिडोर निर्माणका क्रममा हालसम्म ३ अर्ब रुपैयाँ बढी खर्च भइसकेको छ । ५ प्रतिशत मात्र काम बाँकी रहेको यस आयोजना सो आयोजना कुल लागत ४ अर्ब ५८ करोड रुपैयाँ अनुमान गरिएको थियो ।
धोवीखोला कोरिडोर निर्माण गर्न थालेको २ दशक बढी समय लाग्दा पनि हालसम्म सम्पन्न हुन सकेको छैन । लामो समयदेखि म्याद थप हुँदै आएको धोवीखोला करिडोर निर्माण २०७७/७८ सालको अन्तसम्ममा सम्पन्न गर्ने प्राधिकरणको दाबी छ ।
