काठमाडौं । सेयर बजारमा उच्च अंकको कमब्याक भएको छ । गत सोमबारदेखि लगातार ओरालो लागेको नेप्सेमा आज उच्च अंकको बढोत्तरी भएको हो ।
पछिल्ला ७ कारोबार दिनमा मात्रै नेप्से २०५ अंकले घटेको थियो । अर्थमन्त्रालयले सेयर बजारमा देखिएका समस्या समाधान गर्न एक समिति गठन गरेसँगै लगानीकर्ता आशावादी हुँदा बजार फर्किएको हो ।
सूचकसँगै आज कारोबार रकममा पनि बढोत्तरी आएको छ । अघिल्लो दिनको तुलनामा कारोबार रकम २६ करोडले बढेर डेढ अर्ब नाघेको छ ।
बुधबार नेप्से ६०.२२ अंकले बढेर २०८०.४४ विन्दुमा पुगेको छ । यसदिन २३१ कम्पनीको १ अर्ब ६४ करोड ३ लाख ५६ हजार ६०८ रुपैयाँ बराबरको ५० लाख ५ हजार ८१४ कित्ता सेयर किनबेच भएको छ ।
आज कारोबारमा आएका १३ वटै समूहको परिसूचकमा हरियाली छाएको छ । फाइनान्स समूह सबैभन्दा धेरै ५.०४ प्रतिशतले बढेको छ । त्यस्तै, विकास बैंक, हाइड्रोपावर, होटल, व्यापार लगायत ९ समूहको परिसूचक ३ प्रतिशतभन्दा धेरैले बढेको छ ।
आज अरुण भ्याली हाइड्रोपावरको सर्वाधिक कारोबार भएको छ । यसको ५ करोड रुपैयाँ बढीकोे सेयर किनबेच भएको छ । त्यसैगरी, कुमारी बैंक र हिमालयन डिस्ट्रलरी झन्डै ५/५ करोडको कारोबार हुँदै शीर्ष तीनमा रहे ।
उच्च अंक्ले बढेको बजारमा आज ४ कम्पनीको सेयर मूल्यमा पोजेटिभ सर्किट लागेको छ । सामुदायिक लघुवित्त र उपकार लघुवित्तको सेयर मूल्य ठ्याक्कै १० प्रतिशतले बढेको छ भने बलेफी हाइड्रोपावर र कालिका लघुवित्तका सेयरधनीले करिब १० प्रतिशत कमाएका छन् ।
त्यसैगरी, तेह्रथुम पावर ९.४४, उन्नति सहकार्य लघुवित्त ९.२८, सगरमाथा इन्स्योरेन्स, रुरु जलविद्युत्, समिट लघुवित्त, स्वाभिमान लघुवित्त, गुँरास र लघुवित्त र सिंगटी हाइड्रोपावरको सेयर मूल्य ८ प्रतिशतभन्दा धेरैले बढेको छ ।
त्यस्तै, दिव्यश्वरी हाइड्रोपावर, वरुण हाइड्रोपावर, गोर्खा फाइनान्स र प्रोग्रेसिभ फाइनान्सको सेयर मूल्य साढे ७ प्रतिशतले बढेको छ ।
