काठमडौं । सगरमाथा जलविद्युत कम्पनीले झन्डै ५५ करोड रुपैयाँ बराबरको प्राथमिक साधरण सेयर (आइपीओ) निष्काशन गर्ने भएको छ ।
कम्पनीले आयोजना प्रभावित क्षेत्रका स्थानीय र सर्वसाधारणका लागि आइपीओ जारी गर्ने भएको हो । कम्पनीले स्थानीयका लागि ११ लाख २० हजार कित्ता र सर्वसाधारण (आयोजनाका कर्मचारी र म्युचुअल फण्डसहित) ४३ लाख ६८ हजार कित्ता गरी कुल ५४ लाख ८८ हजार कित्ता सेयर निष्काशन गर्न लागेको हो ।
कम्पनीले आइपीओ निष्काशनका लागि प्रभु क्यापिटल लिमिटेडलाई सेयर निष्काशन तथा विक्री प्रबन्धकमा नियुक्त गरेको छ ।
सम्झौतामा सगरमाथा जलविद्युत कम्पनीका अध्यक्ष डा. भोगेन्द्र कुमार गुरागाईं तथा प्रभु क्यापिटल लिमिटेडका प्रबन्ध निर्देशक दिनेश थकालीले हस्ताक्षर गरेका थिए ।
कम्पनीले इलाम नगरपालिकास्थित माई खोलामा सुपरमाइ जलविद्युत ‘ए’ आयोजना निर्माण गरी सञ्चालन गरिरहेको छ । आयोजनाको क्षमता ९.६ मेगावाट रहेको छ ।
आयोजनाले २०७७ जेष्ठ ३२ देखि जलविद्युत उत्पादन सुरु गरिसकेको र आयोजनाले शतप्रतिशत क्षमतामा विद्युत उत्पादन गरिरहेको छ ।
