काठमाडौं । जेठको दुई सातामा बैंकिङ प्रणालीमा १३ अर्ब निक्षेप थपिएको छ । स्थानीय तहको चुनाव (वैशाख ३० गते) बैंकहरुको निक्षेप संकलनमा केही सुधार देखिएको हो ।
नेपाल बैंकर्स संघका अनुसार वैशाख ३० गतेसम्म वाणिज्य बैंकहरुमा ४३ खर्ब ७० अर्ब रुपैयाँ निक्षेप रहेकोमा जेठ १३ गतेसम्म आउँदा १३ अर्ब थपिएर ४३ खर्ब ८३ अर्ब पुगेको छ ।
जेठ पहिलो साता ७ अर्ब र दोस्रो साता ६ अर्ब निक्षेप थपिएको संघले जनाएको छ । आर्थिक वर्षको करिब अन्त्यतिर आउँदा सरकारी खर्च समेत बढेकाले बैंकको निक्षेपमा सुधार आएको बताइएको छ ।
निक्षेप बढेसँगै बैंकहरुको कर्जा लगानी पनि बढेको छ । जेठको दुई सातामा थप ७ अर्ब कर्जा लगानी भएको संघको तथ्यांक्ले देखाएको छ । वैशाख ३० गतेसम्म ४१ खर्ब ९१ अर्ब रुपैयाा कर्जा प्रवाह भएकोमा जेठ १३ गतेसम्म ४१ खर्ब ९८ अर्ब पुगेको छ ।
