काठमाडौं । सरकारले आगामी आर्थिक वर्ष २०७९/८० को लागि बजेट आज संसदमा पेश गरेको छ । अर्थमन्त्री जनार्दन शर्माले पेश गरेको बजेट विशेषतः आर्थिक संकटबाट बाहिर निकाल्न केन्द्रीत रहेको उल्लेख छ ।
कृषि उत्पादनको आयात ३० प्रतिशतले घटाउने लक्ष्यसहित सरकारले कृषिमा निकै महत्वकांक्षी योजना तयार गरेको छ । किसानलाई कर्जा दिन ५ अर्बको लघुवित्त कोष स्थापना गर्ने बजेटले घोषणा गरेको छ ।
प्रधानमन्त्री कृषि परियोजनादेखि किसानलाई सहुलियत दिने, बीउ उत्पादन र वितरण, रासायनिक मलदेखि प्रङ्गारिक मल उत्पादन र वितरणमा सरकारले लगानी गर्ने बजेटमा घोषणा गरिएको छ ।
देशको ५१० स्थानीय निकायमा पशु गर्भाधान केन्द्र स्थापना गर्ने, एक वर्षमा २ लाख गाई र २ लाख भैसीलाई उच्च नश्लको गर्भाधान गराउने, पशुपंक्षी बीमालाई ८० प्रतिशतसम्म अनुदान दिने घोषणा बजेटले गरेको छ ।
उखु उत्पादकलाई अनुदान, चिनीमा आतमनिर्भर, कोल्ड स्टोर निर्माणमा लगानी, कृषि शिक्षाको लागि थप लगानी गर्ने, मुगु, जुम्ला र कालिकोट क्षेत्रमा विशेष कार्यक्रम गर्ने विषय कृषिमा सम्बोधन भएका छन् । कृषिको लागि ५५ अर्ब ९७ करोड रुपैयाँ विनियोजन भएको छ ।
